Եթե Վրաստանն ու Իրանը դիմեն Հայաստանին, Հայաստանը դեմ չի լինի դառնալ տարանցիկ երկիր իրանական գազը Վրաստան հասցնելու համար։ Այսօր հրավիրված կլոր սեղանի ընթացքում այդ մասին հայտարարեց Հայաստանի էներգետիկայի փոխնախարար Արեգ Գալստյանը։
Հարցը հիմա նրանում է, թե Իրանի և Վրաստանի միջև բանակցություններն ինչ արդյունքի կհանգեցնեն։ Եթե մեզ դիմեն՝ մենք որևէ խնդիր չենք առաջացնի, իսկ ավելի մեծ նախագծերի մասին առայժմ վաղ է խոսել։
Հիշեցնենք, որ ավելի վաղ Վրաստանի էներգետիկայի նախարար Կախա Կալաձեն Իրան կատարած պաշտոնական այցի ժամանակ հայտարարել էր, որ 200 միլիոն խորանարդ մետր գազ Իրանից կարող է մատկարարվել Վրաստան հենց Հայաստանի տարածքով․ մասնագետների գնահատմամբ՝ Վրաստանն այդպիսով փորձ է անում դիվերսիֆիկացնել և թուլացնել ադրբեջանական գազի մենաշնորհային դիրքը Վրաստանում։
Ռուսաստանի «Ազգային էներգետիկ անվտանգության հիմնադրամ»-ի հիմնադիր և գլխավոր տնօրեն, տնտեսական և քաղաքական վերլուծաբան Կոնստանտին Սիմոնովը նույն քննարկման ընթացքում անդրադառնալով հարցին, թե Ռուսաստանն ինչպես կնայի այդ հանգամանքին, հայտարարեց, թե չի կարծում՝ դեմ լինի։
Չեմ կարծում, թե Վրաստանին սա դիվերսիֆակիացնելու հնարավորություն կտա, խոսքը բավականին փոքր մասշտաբի մասին է։ Եթե Իրանը ցանկություն ունենա Հայաստանի տարածքով տանել, չեմ կարծում Ռուսաստանը խոչընդոտի։ Ես չեմ կարծում, թե սա այնքան մեծ նշանակություն ունեցող հարց է, որ Ռուսաստանը դրա համար գլուխ կոտրի։
«Հայաստանի վերականգնվող էներգետիկայի հիմնադրամ» ծրագրի ղեկավար Արա Մարջանյանը մեզ հետ զրույցում տեսակետ հայտնեց, որ սա Հայաստանի համար լավ հնարավորություն է և մենք այն չպետք է բաց թողնենք։ Հույս ունեմ, որ Ռուսաստանը խոչընդոտելու փոխարեն կօժանդակի։
Ինչ վերաբերվում է փոխնախարարի այն հայտարարությանը, որ եթե Իրանն ու Վրաստանը մեզ դիմեն՝ մենք դեմ չենք լինի, Մարջանյանն ընդգծեց՝ Հայաստանը պետք է ինքը նախաձեռնող լինի։