Լատվիայում վաճառքի են դրել Ռուսաստանի նախագահ Վլադիմիր Պուտինի անունը կրող Պուտինկա գյուղի հողակտորները: Այս մասին հայտնում է Mixnews-ը:
TVNET.lv-ի տեղեկություններով՝ դա Vianets ընկերության կողմից ստեղծվող էկոբնակավայրերից մեկն է:
«Մենք կարծում ենք, որ Վլադիմիր Վլադիմիրովիչ Պուտինը ժամանակակից պատմության ականավոր քաղաքական գործիչ է և շատ բան է արել Ռուսաստանի, հարակից տարածաշրջանների և ընդհանուր առմամբ ողջ աշխարհի համար»,- հայտարարել է ընկերության ներկայացուցիչ, Լատվիայի Սեյմի նախկին պատգամավոր Ալեքսեյ Խոլոստովը: Նրա կարծիքով՝ նման անվանումով բնակավայրի առկայությունը մեծ պատիվ կդառնա Լատվիայի համար:
Պուտինկայի համար վայր է ընտրվել Ռիժսկի շրջանում՝ Ռիգայի և Յուրմալայի միջև: Վաճառքի են հանվել 2500-3300 քառակուսի մետր մակերեսով 9 հողակտորներ: 3200 քառակուսի մետր մակերեսով հողակտորը գնահատվում է 20 հազար եվրո:
Հողակտորների գնորդները, ինչպես հաղորդվում է նախագծի կայքում, Լատվիայում կեցության իրավունք կստանան, ինչը նրանց թույլ կտա առանց այցագրի ճանապարհորդել Եվրոպայում: Էկոբնակավայրերի ցանցում կա նաև Մեդվեդևկա անվանմամբ բնակավայր:
