ԵԽԽՎ հայկական պատվիրակության անդամ Նաիրա Զոհրաբյանը, ով այս օրերին գտնվում է Ստրասբուրգում «Առաջին լրատվական»-ի հետ տեսաձայնային կապով անդրադառնալով ԵԽԽՎ ձմեռային նստաշրջանում հակահայկական երկու բանաձևերի քվեարկությանը, որի արդյունքում չընդունվեց բրիտանացի պատգամավոր Ռոբերտ Ուոլթերի՝ «Բռնության աճը Լեռնային Ղարաբաղում և Ադրբեջանի այլ գրավյալ տարածքներում» զեկույցը՝ ասաց. «Ես չեմ ցանկանում անդրադառնալ Եվրոպայի խորհրդի խորհրդարանական վեհաժողովում երկու բանաձևերի բովանդակությանը, ամբողջ ընթացքին, և թե ինչպես եղավ, որ այդ բանաձևերը հասան մինչև լիագումար նիստ: Հայաստանյան մամուլը, Հայաստանի քաղաքական վերլուծական շրջանակները վերջին ամիսներին իրենց քննարկման հիմնական թեման դարձրել էին այս բանաձևերը»:
Նրա խոսքով՝ ԵԽԽՎ-ում, չնայած մեծ ջանքերին, այնուհանդերձ՝ գտնվեցին պատգամավորներ, ովքեր ուղղակիորեն դեմ քվեարկելով նման նախագծին՝ չմտան շատ վտանգավոր մի գործընթացի մեջ, որի հետևանքները կարող են լինել անկանխատեսելի:
Ինչ վերաբերում է Մարկովիչի զեկույցին՝ Սարսանգի ջրամբարի վերաբերյալ, Նաիրա Զոհրաբյանն ասաց. «Այո՛, այդ զեկույցը ընդունվեց, և այստեղ մենք վերլուծելու, քննարկելու, հետևություն անելու շատ բան ունենք, բայց նաև պիտի հասկանանք, որ մթնոլորտի լրջագույն փոփոխություն է նկատվում ԵԽԽՎ-ում»:
Հայկական պատվիրակության անդամը շատ կարևորեց քվեարկությանը բրիտանացի պատվիրակների խմբի պահվածքը. «Բրիտանական պատվիրակությունը որևէ անգամ այսպես բացահայտ դեմարշ Ադրբեջանի հանդեպ ցույց չի տվել, ինչն արվեց Ուոլթերի զեկույցի ժամանակ: Բրիտանացի պահպանողականները կա՛մ քվեարկեցին ձեռնպահ, կա՛մ պաշտպանեցին մեր դիրքորոշումը՝ դեմ քվեարկելով Ուոլթերի զեկույցին: Մենք պետք է սա շատ գնահատենք, որովհետև հասկանում ենք Ադրբեջանի և Բրիտանիայի շատ սերտ նավթային կապերը: Եվ երբ բրիտանացի պահպանողականները, և ոչ միայն նրանք, մյուս խմբերում ներկայացված պատվիրակները ևս, չսատարեցին ադրբեջանամետ այս նախագիծը, սա իսկապես ես շատ լուրջ և կարևոր ձեռքբերում եմ համարում»:
Ուոլթերի զեկույցի մերժումը Նաիրա Զոհրաբյանը համարում է շատ առողջ մեսիջ միջազգային հանրությանը, և «մենք պետք է կարողանանք ճիշտ աշխատել եվրոպացիների հետ և չոգևորվենք»:
Նաիրա Զոհրաբյանի համոզմամբ՝ «երբ դու մոբիլիզացնում ես քո ողջ ռեսուրսը և աշխատելու ճիշտ նշանակետեր ես ընտրում, ուրեմն արդյունքի հասնել հնարավոր է: Հինգ քաղաքական խմբերից ըստ էության միայն մեկը՝ լիբերալ-դեմոկրատները, կողմ արտահայտվեցին այդ նախագծին:
Հերթական անգամ մենք հասկացանք, որ մեր ուժը մեր միասնության, մեր համատեղ աշխատանքի, ջրբաժաններ չգծելու մեջ է»:
