Երևանի ավագանու ընտրությունների արդյունքները չեն բողոքարկի ԲՀԿ-ն, ՀՅԴ-ն, այս պահին բողոքարկման մասին հայտարարել են ՀԱԿԿ-ն, «Բարև, Երևան» դաշինքը:
2009-ին բողոքարկման փորձ արեց ՀԱԿ-ը՝ Երևանի ավագանու ընտրություններն անվավեր ճանաչելու պահանջով: Իրավաբան Արտակ Զեյնալյանը հիշեցրեց, որ ՀԱԿ դաշինքը 2009-ին դիմեց վարչական դատարան՝ ընտրությունների արդյունքներն անվավեր ճանաչելու պահանջով, բայց դաշինքի մաս կազմող Մարքսիստական կուսակցությունը իր ստորագրությունը հետ կանչեց դիմումի տակից, և վարչական դատարանը քննարկման առարկա չդարձրեց անվավեր ճանաչելու պահանջը:
Նրա խոսքով՝ եթե Երևանի ավագանու ընտրությունները լինեին համապետական, որտեղ հնարավոր է ԿԸՀ-ի որոշումը վիճարկել նաև Սահմանադրական դատարանում, ապա այս ընտրություններում այնքան շատ են խախտումների վերաբերյալ արձանագրություններ հավաքված, որ համեմատելով նախագահական ընտրությունների հետ կապված Սահմանադրական դատարանի եզրակացությունների հետ, կարող ենք ասել, որ այս ընտրությունների արդյունքները անվավեր կճանաչվեին, բայց այս ընտրություններում խոսքը վարչական դատարանի մասին է:
Արտակ Զեյնալյանի խոսքով՝ տվյալ դեպքում շատ քիչ հավանական է, որ ընտրությունների արդյունքները վարչական դատարանն անվավեր կճանաչի:
«Վարչական դատարանը ընտրական վեճերի դեպքում ընդհանրապես, տվյալ դեպքում առավելապես կանգնած է ռեժիմի թիկունքում և պաշտպանում է ռեժիմին ժողովրդից ու իր դատական ակտերով սրբագրում ռեժիմի թույլ տված սխալները, և հավանական է, որ ընտրությունների արդյունքները անվավեր չեն ճանաչի, բայց խախտումները ավելի քան բավարար են անվավեր ճանաչելու համար»,- նկատեց իրավաբանը:
Այդ դեպքում որքանո՞վ է ճիշտ բողոքարկել, երբ կանխավ պարզ են արդյունքները, Արտակ Զեյնալյանը նշեց, որ դիմել պետք է անպայման և պայքարի այս փուլն անպայման պետք է իրականացնել շատ բարձր մակարդակով՝ լրջորեն մոտենալով խնդրին, դիտորդական կազմակերպությունները այս ընտրություններում շատուշատ փաստեր են արձանագրել գրանցամատյաններում:
«Բնականաբար, վարչական դատարանը սա անվավեր չի ճանաչի, բայց այդ խայտառակ դատական ակտը գոնե կմնա պատմության մեջ, և այդ ամոթանքը հետագայում ազդեցություն կունենա»,- ասաց Արտակ Զեյնալյանը:
