«Երևանի ավագանու ընտրությունները բացարձակապես չեն համապատասխանում ժողովրդավարության չափանիշներին», այսօր հայտարարել են դիտորդական առաքելություն իրականացրած տեղական շուրջ տասը կազմակերպություններ:
Հայաստանի Հելսինկյան կոմիտեի նախագահ Ավետիք Իշխանյանը, թվարկելով արձանագրված խախտումները, նշել է, որ եղել են ահազանգեր բաժանվող ընտրակաշառքի մասին, տեղամասերի մոտ արձանագրվել են համատարած կուտակումներ, որն արգելվում է օրենքով, ինչ-որ անձինք անընդհատ մարդկանց են բերել ընտրությունների, ուղղորդել են, իսկ ոստիկանությունը հիմնականում անգործության է մատնված եղել: Վստահված անձանց կողմից խոչընդոտվել են լրագրողների և դիտորդների աշխատանքը, արձանագրվել է նաև ոչ լիազորված անձանց ներկայություն ընտրատեղամասերում:
Transparency International հասարակական կազմակերպության փոխտնօրեն Սոնա Այվազյանը, ներկայացնելով իրենց և մի քանի այլ կազմակերպությունների դիտորդների կողմից արձանագրված խախտումները, նշել է, որ խոչընդոտվել են դիտորդների և լրագրողների աշխատանքը, նրանց հասցեին հնչել են սպառնալիքներ, հայհոյանքներ, որոշ տեղամասերում ուղղակի իշխել են «թաղային» հեղինակությունները: Սոնա Այվազյանը վկայակոչել է Մալաթիա-Սեբաստիա վարչական շրջանի 08 և 09 տեղամասերը, որտեղ ողջ օրվա ընթացքում լարված իրավիճակը պահպանվել է: Այստեղ էր ժամանել անձամբ գործարար պատգամավոր Սամվել Ալեքսանյանը, փորձելով սաստել Հանրապետականի ներկայացուցիչներին: Ալեքսանյանն անգամ սպառնացել է, որ «իր ձեռքից չեն պրծնի», եթե կրկին այդ տեղամասից զանգ ստանա:
Այվազյանը նշել է, որ չորս ընտրատարածքներում տեղ գտած ընտրախախտումների վերաբերյալ 40 բողոք են ներկայացրել հանձնաժողովներին, և դրանց թիվը մինչև երեկոյան վեցը կարող է աճել:
Հայաստանի Հելսինկյան կոմիտեի դիտորդները, վերը թվարկված ընտրախախտումներից բացի, Դավիթաշեն վարչական շրջանում արձանագրել են նաև շրջիկ խմբի առկայություն, երբ նույն մարդիկ մի քանի անգամ քվեարկել են: Կոմիտեի նախագահ Ավետիք Իշխանյանը, համեմատություն անցկացնելով, նշեց, որ ի տարբերություն նախագահական ընտրությունների, ավագանու ընտրությունների ժամանակ իշխանությունը գործի դրեց բոլոր ռեսուրսները, արդյունքում` Տարոն Մարգարյանը Երևանում ավելի շատ ձայն հավաքեց, քանի Սերժ Սարգսյանը (եթե փետրվարի 18-ի նախագահի ընտրություններում Սերժ Սարգսյանը Երևանում ստացավ մոտ 208 հազար ձայն, ապա Տարոն Մարգարյանը` 235 հազար ձայն):
«Այդ ուժեղ աշխատանքի արդյունքում Տարոն Մարգարյանը Երևանում հաղթեց Սերժ Սարգսյանին», – ասել է Իշխանյանը:
Արձանագրված բազմաթիվ ընտրախախտումներից բացի` տեղական դիտորդական կազմակերպությունները մտահոգիչ են համարել, որ մայիսի 5-ին տեղի ունեցած ընտրություններին դիտորդական առաքելություն են իրականացրել մի շարք այլ կազմակերպություններ, որոնք իրականում չեզոք չեն եղել և պաշտպանել են այս կամ այն քաղաքական ուժի շահերը, այսինքն` ստանձնել են վստահված անձի դեր և ուղղորդել են ընտրողներին:
«Էրեբունի համայնքների զարգացման կենտրոն, Տնտեսական և սոցիալական կենտրոն, «Կյանք» մարդու իրավունքների քաղաքականության հումանիտար պրոբլեմների միջազգային ասոցիացիա` այս երեք կազմակերպությունները աշխատել են Հանրապետական կուսակցության օգտին: Եվ մեկ կազմակերպություն` Համահայկական երիտասարդական ասոցիացիան, աշխատել է «Բարգավաճ Հայաստանի օգտին», -փաստել է Իշխանյանը:
Հարցին, թե ինչպե՞ս են բացատրում միջազգային և տեղական դիտորդների գնահատականների խիստ տարբերությունը, Հելսինկյան կոմիտեի նախագահն ասել է, որ եթե միջազգային դիտորդները ցանկանային, ապա կարձանագրեին բոլոր խախտումները:
«Միջազգային դիտորդները պետք է առավոտից իրիկուն մնային խնդրահարույց տեղամասերում և այդ ժամանակ եթե ուզենային, կարող էին ճիշտ եզրակացություն տալ», – ասել է Իշխանյանը:
