Մալայզիայում վարչապետ Մուհամմադ Աբդուլ Ռազակի գլխավորած իշխող «Ազգային ճակատ» կոալիցիան հաղթել է երեկ կայացած խորհրդարանական ընտրություններում: Այս մասին հայտնում է ITAR-TASS-ը՝ հղում անելով ընտրական հանձնաժողովի նախագահին:
Երկրի խորհրդարանի Ներկայացուցիչների պալատը 222 տեղ ունի: Ներկայում հաշվարկված են ընտրատեղամասերի մեծ մասից ստացված արդյունքները: Իշխող կոալիցիան ստացել է 112 տեղ՝ ձեռք բերելով կառավարություն ձևավորելու իրավունք:
Իշխող կոալիցիայում ներառված է 13 քաղաքական կուսակցություն: Կոալիցիան Մալայզիայում իշխանության ղեկին է արդեն 56 տարի՝ երկրի անկախության ձեռք բերման պահից:
Ընտրություններին ընդդիմությունը ներկայացրել է 3 կուսակցությունից կազմված «Ժողովրդական դաշինքը»: Ընդդիմության առաջնորդը նախկին փոխվարչապետ Անվար Իբրահիմն է: Ներկա դրությամբ դաշինքը ստացել է 58 տեղ:
Ընտրություններին մասնակցությունը եղել է բարձր. քվեարկությանը մասնակցել է ընտրելու իրավունք ունեցող 13 մլն քաղաքացիների 80 տոկոսը:
Ընտրությունների ընթացքին հետևել են 1200 տեղացի և 18 արտասահմանցի դիտորդներ:
