ԱՄՆ նախագահ Բարաք Օբաման երբեք անձնական զենք չի ունեցել: Դա ասելուց է սկսվել հինգշաբթի նրա խոսակցությունը երկրի բնակչության հետ CNN հեռուստաալիքի եթերում: «Ես երբեք անձնական զենք չեմ ունեցել»,- ասել է Օբաման:
Ճիշտ է, նա ավելացրել է, որ Քեմփ-Դևիդի իր նստավայրում ստենդային հրաձգության համար սարքավորում կա, և ինքը այն երբեմն օգտագործում է: «Դա չի նշանակում, որ ես ինչ-որ բանի եմ հավակնում դիպուկության առումով»,- ժպիտով ասել է Օբաման:
Խոսակցության առիթ են դարձել օրերս Օբամայի ընդունած միջոցառումները երկրում զենքի շրջանառության վերահսկողության ուժեղացման համար: Այդ որոշումները սրերով են ընդունել ԱՄՆ զենքի ոլորտի լոբբին և նրա մեծաթիվ դաշնակիցներն ամերիկյան Կոնգրեսում՝ հատկապես հանրապետական ընդդիմության շարքերում: Երկրի ղեկավարին մեղադրել են լիազորությունների չարաշահման և ամերիկացիների սահմանադրական իրավունքները ոտնահարելու մեջ:
Դեբատների ընթացքում Օբաման նշել է, որ «ոչ մի նոր օրենք չի սահմանել», քանի որ դա Կոնգրեսի արտոնությունն է, այլ միայն փորձել է «որոշ սողանցքեր փակել գործող օրենքներում»:
ԱՄՆ նախագահն այս շաբաթ հրահանգել է ստուգել բոլոր զենք գնողներին՝ ներառյալ նրանց, ովքեր զենք են գնում համացանցում և ցուցահանդեսներին: Օբաման նաև մի շարք այլ նախաձեռնություններ է ներկայացրել՝ ներառյալ «խելացի» զենքի մշակում, որը կրակում է միայն օրինական տիրոջ ձեռքում:
