Ապրիլի 17-ին Հայ ազգային կոնգրես դաշինքի մի շարք կուսակցություններ համատեղ հայտարարություն տարածեցին Հայ ազգային կոնգրեսի քաղաքական խորհրդի աշխատանքների վերսկսման մասին: Հայտարարության մեջ նշված էր, որ Հայ ազգային կոնգրեսի կողմից նախկինում ձևավորված մարմինները լուծարվում են:
«Հայ ազգային կոնգրեսի քաղաքական խորհրդի նիստերը` ռոտացիոն սկզբունքով, վարելու են կուսակցությունների նախագահները:
Հայ ազգային կոնգրեսը դիմում է իր կազմից դուրս եկած կուսակցություններին՝ վերադառնալ Հայ ազգային կոնգրես նախկինում հռչակված նպատակներին համատեղ ուժերով հասնելու համար: ՀԱԿ-ի կազմը հստակեցնելուց հետո Հայ ազգային կոնգրեսի քաղաքական խորհուրդը քննարկելու է անվանման, Ազգային ժողովում ՀԱԿ դաշինքի խմբակցության և ընտրական հանձնաժողովներում Հայ ազգային կոնգրեսի հանձնաժողովների անդամների հարցերը»,- ասված էր հայտարարության մեջ:
Հայտարարությանն անդրադարձել էր ՀԱԿ կուսակցությունը՝ հորդորելով չներկայանալ ՀԱԿ քաղխորհրդի անունից: «Առաջին լրատվական»-ի հետ զրույցում այս մասին ասաց «Քրիստոնեա-ժողովրդավարական վերածնունդ» կուսակցության նախագահ Սոս Գիմիշյանը, ով գործընթացի նախաձեռնողներից մեկն էր: Նրա խոսքով՝ նախապատրաստական աշխատանքները դեռ շարունակվում են, համագործակցում են, հարցեր են քննարկում: Նա հույս հայտնեց, որ կընդլայնվեն, ավելի ուժեղ կլինեն և կկարողանան օգտակար լինել պետությանը ու ժողովրդին:
«Դեռևս անվան հարցում էլ համաձայնություն ձեռք չենք բերել և, ինչպես ավելի վաղ ասել էինք, այդ հարցում էլ համաձայնություն ձեռք կբերենք, երբ ՀԱԿ բոլոր կուսակցությունների միանալու հարցը պարզաբանված լինի, դրանից հետո նոր կանդրադառնանք անվանը, քանի որ եթե հիմա ութ կուսակցություններով որոշենք՝ ինչ անվանում պետք է լինի, հետո միացածների հետ էլ նոր անուն պետք է քննարկենք, ու խնդիր կառաջանա:
Կսպասենք՝ մինչև վերջնական կազմը հաստատվի, այնուհետև կանդրադառնանք անվանը: Ես հույս ունեի, որ ավելի շուտ կավարտվեն նախապատրաստական այս աշխատանքները, բայց փոքր-ինչ ձգվեցին:
ՀԱԿ-ից դուրս եկած կուսակցություններից շատերի ներկայացուցիչների հետ հեռախոսազրույց եմ ունեցել, պայմանավորվել եմ հանդիպումների շուրջ, հույս ունենք, որ մեկ շաբաթվա ընթացքում կավարտվեն հանդիպումները, պատասխան կունենանք»,- մանրամասնեց Գիմիշյանը:
Վերջինս հույս հայտնեց, որ դրական պատասխան կստանան ՀԱԿ-ը լքած բոլոր կուսակցություններից էլ, քանի որ ՀԱԿ-ի կազմում նրանք գաղափարական հակասություններ էին ունենում ՀՀՇ-ի հետ, իսկ ՀՀՇ-ն այլևս չկա:
