Այսօր ՀՖՖ նիստերի դահլիճում կայացավ Հայաստանի ֆուտբոլի ֆեդերացիայի նախագահ Ռուբեն Հայրապետյանի և «Կոկա-կոլա հելլենիկ բոթլինգ քամփնի Արմենիա» ընկերության գլխավոր տնօրեն Գագիկ Դանիելյանի մամուլի ասուլիսը, որը նվիրված է «Հայաստանի ֆուտբոլի ֆեդերացիա – Կոկա-կոլա – գավաթ 2011» համատեղ անցկացվող մրցաշարի երկրորդ փուլի մեկնարկին:
Ասուլիսը սկսվեց տհաճ միջադեպով. Ռուբեն Հայրապետյանը դահլիճից դուրս հրավիրեց ֆոտոլրագրող Հակոբ Բերբերյանին` վկայակոչելով երեկ Հ2 հեռուստաընկերության ֆուտբոլային հաղորդման ժամանակ վերջինիս հնչեցրած խոսքերը:
«Որոշ լրագրողներ ասում էին՝ ակրեդիտացիա է պետք, չէ՞։ Բարև ձեզ, ժողովուրդ: Մի րոպե, դուք՝ դուրս, ակրեդիտացիա չունեք: Դուք երեկ հեռուստատեսությամբ ասում էիք, որ ես կարող եմ արգելել Ձեզ: Իրականում իրավունք չունեմ նման բան անելու: Ես արտահայտում եմ քո ասածը: Հայաստանի Հանրապետությունում օրենք կա: Լրագրողի աշխատանքը ոչ մեկը իրավունք չունի խոչընդոտի: Գոյություն ունի օրենք: Օրենքից վերև ոչ մեկը չի: Հիմա, որ ես քեզ ասում եմ, ես իրավունք չունեմ: Ես կրկնում եմ քո բառերը»,- այսպես սկսեց ասուլիսը Ռուբեն Հայրապետյանը:
Այնուհետև մամուլի խոսնակ Տիգրան Իսրայելյանը հիշեցրեց, թե ինչի համար են այնտեղ հավաքվել: Ռուբեն Հայրապետյանն իր շնորհակալական խոսքն ասեց «Կոկա-կոլա հելլենիկ բոթլինգ քամփնի Արմենիա» ընկերությանը` ընդգծելով վերջիններիս ահռելի ներդրումը հայկական ֆուտբոլի զարգացման գործում: Խոսեց նաև «Կոկա-կոլա հելլենիկ բոթլինգ քամփնի Արմենիա» ընկերության գլխավոր տնօրեն Գագիկ Դանիելյանը: Վերջինը նույնպես արժևորեց ընկերության կատարած աշխատանքը` նշելով, որ Հայաստանը միակ երկիրը չէ, որտեղ նման հովանավորություններ են կատարվում: Այնուհետև լրագրողներն իրենց հարցերն ուղղեցին ասուլիսի մասնակիցներին:
Ինչպես և սպասվում էր, հարցերի մեծամասնությունն ասուլիսի թեմային չէին վերաբերում:
Հայաստան-Ռուսաստան հանդիպմանն առնչվող հարցերին պատասխանելիս Ռուբեն Հայրապետյանը հայտարարեց, որ ՀՖՖ-ն ամեն ինչ կատարել է ՈՒԵՖԱ-ի կանոնների համաձայն: Ռուս երկրպագուների բողոքների հետ կապված ոչ մի նամակ ՀՖՖ-ն ՌՖՄ-ից չի ստացել: Հարց հնչեց նաև Արկադի Անդրեսյանի հետ կապված սկանդալի մասին, ինչին Ռուբեն Հայրապետյանը պատասխանեց. «Ֆեդերացիայի կողմից առայժմ որոշում չի կայացվել: Կարգապահական կոմիտեն առաջարկ է մտցրել գործկոմ: Դեռ կոմիտեի նիստ չի եղել, կլինի՝ նրանից հետո, գործադիր կոմիտեի նիստն էլ բաց է լինելու բոլոր լրատվամիջոցների համար»:
