Juniper Research-ի վերլուծաբանների վերջին զեկույցի համաձայն՝ վերջին 4 տարում սմարթֆոններում ու պլանշետներում խաղային հավելվածների բեռնումը զգալիորեն ավելացել է: Կանխատեսվում է մինչև 2017թ. նմանատիպ 64.1 մլրդ բեռնում, ինչը եռակի շատ է 2012-ի համեմատ:
Այդ աճին հիմնականում նպաստում են անվճար խաղերը (freemium բիզնես-մոդել), ինչպես նաև ավելի բարդ սարքերի գործարկումն ու սմարթֆոնների շուկայի զարգացումը:
Freemium-ը՝ որպես բիզնես-մոդել խաղային հավելվածների համար, վճռորոշ դեր է խաղում, ինչն ակնհայտ է զեկույցում ներկայացված թվերից՝ հայտնում է vestifinance.ru-ն:
Մինչև 2017թ. ակնկալվում է, որ խաղերի բեռնման միայն 7%-ը վճարովի կլինի:
Juniper-ում ասվում է, որ բջջային սարքերը գլխավոր էկրան կդառնան խաղերի սիրահարների համար շնորհիվ բարդ հավելվածների աճի, որը թույլ է տալիս կազմակերպել իսկական մուլտիհարթակային խաղ ամպային տեխնոլոգիաների միջոցով:
Սարքերում հիշողության աճը նույնպես նպաստում է ավելի շատ քանակությամբ խաղերի բեռնմանը:
Համաձայն կանխատեսումների՝ բջջային սարքերի համար առավել հայտնի կդառնան սոցիալական ու կազուալ խաղերը: Դրանց բաժին կընկնի բեռնումների 50 տոկոսը: Նրանք միշտ միացած են սոցիալական ծառայություններին ու հարմար են հերթերում ժամանակը սպանելու համար:
