Կենտրոն և Նորք Մարաշ վարչական շրջանների ընդհանուր իրավասության դատարանը այսօր հրապարակել է Սեյրան Օհանյանի կինն ընդդեմ «Հրապարակ» օրաթերթի գործով վճիռը։ Դատարանն ըստ էության բավարարել է պաշտպանության նախարարի տիկնոջ պահանջը, և օրաթերթին պարտավորեցրել է հերքում հրապարակել, ինչպես նաև կայքից հեռացնել վիճահարույց հրապարակումը։
Հիշեցնենք, որ «Հրապարակ» օրաթերթը ժամանակ առաջ անդրադարձել էր նախարարի տիկնոջը և հղում անելով կայքերից մեկին հրապարակել էր «Հանրությունն ուզում է իմանալ» հոդվածը, որտեղ անդրադարձ էր կատարվել նախարարի տիկնոջ և նրա ընկերոջ մասնակցությամբ մի վթարի դեպքի։ Ըստ այդ հրապարակման՝ վթարի պահին մեքենայի ղեկին եղել է Ռուզաննա Խաչատրյանը և վթարի հետևանքով նրա ընկերը՝ գործարար Փայլակ Հայրապետյանի որդին մահացել էր։
Ռուզաննա Խաչատրյանի փաստաբան Կարեն Մեջլումյանն «Առաջին լրատվական»-ի հետ զրույցում ասաց, որ իրենց բավարարում է դատարանի որոշումը։ Դատարանն իրենց պահանջներից չի բավարարել միայն պատասխանի հրապարակման պահանջը, սակայն եթե թերթին պարտավորեցրել է հերքում տպագրել, ապա, դա գրեթե նույն բանն է։
Ինչ վերաբերում է կայքից հրապարակումը հեռացնելուն, ապա Կարեն Մեջլումյանը դատարանի այդ որոշումը նախադեպային համարեց։
Հրապարակման հեղինակ, լրագրող Սյուզան Սիմոնյանն էլ «Առաջին լրատվական»-ի հետ զրույցում ասաց, որ զարմանալի ոչինչ չկա դատարանի որոշման մեջ։ Բնավ պետք չէր սպասել, որ Հայաստանում դատարանը կարող էր պաշտպանության նախարարի կամ նրա տիկնոջ դեմ որոշում կայացնել։ Սիմոնյանը նաև ասաց, որ իրենք պարտադիր սպառելով ներպետական ատյանները դիմելու են Եվրոպական դատարան։
