Երեկ պաղեստինյան ամենամեծ «Ֆաթհ» և «ՀԱՄԱՍ» խմբավորումները համաձայնություն են ստորագրել, որով պայմանավորվել են հաշտության և պաղեստինյան ինքնավարությունում ընտրություններ անցկացնելու վերաբերյալ: Այս մասին հաղորդում է Reuters գործակալությունը: «ՀԱՄԱՍ»-ի ներկայացուցիչն ասել է, որ «Ֆաթհ»-ի և «ՀԱՄԱՍ»-ի միջև բոլոր տարաձայնությունները հարթված են:
Այս բանակցությունները տեղի են ունեցել Կահիրեում, եգիպտական հետախուզության միջնորդությամբ, ինչի մասին էլ հայտարարել է Եգիպտոսի այդ գերատեսչությունը:
Հիշեցնենք, որ հակասությունները երկու կողմերի միջև առաջացել էին 2006 թ., ինչի համար առիթ էր հանդիսացել վարչապետ Իբրահիմ Հանիայի դեմ իրականացված մահափորձը: «ՀԱՄԱՍ»-ը ներկայացնող Հանիայի վրա հարձակում էին իրականացրել «Ֆաթհ»-ի ներկայացուցիչները: 2007 թ. փաստացի պառակտում տեղի ունեցավ, իսկ Պաղեստինը բաժանվեց երկու մասի. Արևմտյան ափը մնաց գործող նախագահ Մահմուդ Աբասի վերահսկողության տակ, իսկ «ՀԱՄԱՍ»-ը «վերցրեց» Գազայի հատվածը` այնտեղ ձևավորելով սեփական կառավարությունը:
Հաշտության այս փաստը կարևոր է նաև առաջիկա ամիսների ընթացքում Պաղեստինի անկախության հռչակման հնարավորության համատեքստում, ինչին, կարծես, ձգտում է միջազգային հանրությունը:
