Թուրքական Dünya Bülteni լրատվական կենտրոնի փոխանցմամբ՝ երեկ Անկարայում տեղի է ունեցել Բարձրագույն ռազմական խորհրդի (YAŞ) նիստ։ Գլխավոր շտաբի շենքում տեղի ունեցած նիստում նախագահել է վարչապետ Ահմեթ Դավութօղլուն։
Նիստը տևել է 7 ժամ, 15 րոպե։ Նիստի ընթացքում քննարկվել են թուրք-սիրիական սահմանի զարգացումները, Ռուսաստանի հետ դիվանագիտական ու ռազմական հարաբերությունների վիճակը, երկու երկրների զինված ուժերի միջև անցանկալի միջադեպերի կանխման համար միջոցները։
Նիստից հետո Գլխավոր շտաբի տարածած հայտարարությունում նշված է, որ Ռուսաստանի հետ կապի դիվանագիտական ու ռազմական աղբյուրները բաց են, և որ Գլխավոր շտաբը միջոցներ է ձեռնարկում երկու երկրների զինված ուժերի միջև անցանկալի միջադեպերից խուսափելու ուղղությամբ։
YAŞ-ի նիստում քննարկվել են նաև զինված ուժերի մարտական պատրաստության հարցը, ահաբեկչության դեմ պայքարը, սահմանների պաշտպանությունը, Սև և Միջերկրական ծովերում անվտանգության ապահովման հարցը։
Սրանից առաջ հաղորդվել էր, որ ՌԴ ՊՆ-ն խզել է Թուրքիայի զինված ուժերի հետ փոխգործակցության բոլոր ձևերը։
