Ռուսաստանը ժխտել է Թուրքիայի այն պնդումները, թե թուրք օդաչուները չեն իմացել, թե նոյեմբերի 24-ին ում ռազմական ինքնաթիռն են իրենք խփել Սիրիայի հետ սահմանի շրջանում։
Ռուսաստանի նախագահ Վլադիմիր Պուտինը Ֆրանսիայի նախագահ Ֆրանսուա Օլանդի հետ Մոսկվայում անցկացված համատեղ մամուլի ասուլիսի ընթացքում հայտարարել է, որ ռուսական ինքնաթիռները չճանաչել հնարավոր չէ՝ Անկարայի հայտարարությունները համարելով «անհեթեթություն եւ պատրվակներ»:
«Դրանց վրա կան ճանաչողական նշաններ, և դրանք լավ երևում են»,- պարազաբանել է Պուտինը:
«Մենք վաղօրոք ամերիկյան կողմի հետ ունեցած համաձայնությանը համապատասխան՝տեղեկատվություն ենք հաղորդել, թե որտեղ է գործելու մեր օդուժը»,- հավելել է Ռուսաստանի նախագահը:
Ավելի վաղ, ելույթ ունենալով Ֆրանսիայի France 24 հեռուստաալիքի եթերում, Թուրքիայի նախագահ Ռաջեփ Թայիփ Էրդողանը պնդել էր, թե թուրք զինվորականները կգործեին այլ կերպ, եթե հաստատ իմանային, որ այդ ինքնաթիռը ռուսական է: