Ինչպես հաղորդում է BBC-ն, Տիբեթի չճանաչված պետության ղեկավար է ընտրվել Լոբսանգ Սանգայը: Հնդկաստանում ծնված 42-ամյա Սանգայը Հարվարդի համալսարանի պրոֆեսոր է: Նրան ընտրել է քվեարկողների 55%-ը: Նա հենց սկզբից համարվում էր ամենահավանական թեկնածուն: Դալայ Լաման, որը մինչ այդ հանդիսանում էր նաև Տիբեթի քաղաքական ղեկավարը, հրաժարվել է այդ պաշտոնից` պնդելով, որպեսզի գործադիր իշխանությունն անցնի վարչապետին:
Ընտրությունները կայացել էին դեռ մարտ ամսին, սակայն արդյունքները հիմա են հրապարակվում: Դրանք անցկացվել են հնդկական Դարամսալայում, որտեղ գտնվում է Տիբեթի վտարանդի կառավարությունը: Ընտրություններին մասնակցել է 49 հազար մարդ: Նոր վարչապետը Տիբեթում երբեք չի ապրել: Նրա հայրը 1959 թ. է լքել Տիբեթը: Հիմա նոր վարչապետն ապրում է ԱՄՆ-ում, սակայն պատրաստվում է մեկնել Դարամսալայ:
