Փարիզում ահաբեկչություններից ցնցված Ֆրանսիան և Բելգիան անվտանգության ավելի խիստ միջոցառումներ են ներդնում՝ Եվրոպայում քննարկում առաջացնելով, թե ինչպես հավասարակշռել ահաբեկչության դեմ պայքարին ուղղված ջանքերը և քաղաքացիական ազատությունների պահպանումը: Այս մասին գրում է The New York Times պարբերականը:
Հաշվի առնելով հուզական լարվածությունը՝ մի կողմից և քաղաքական ճնշումը՝ մյուս կողմից, ֆրանսիական և բելգիական իշխանությունները հստակ հասկացրել են, որ ներկայումս իրենք քաղաքացիների պաշտպանության հարցը մնացած ամեն ինչից վեր են դասում:
Նշվում է, որ 2001թ. սեպտեմբերի 11-ի ողբերգությունից հետո երկրների համար գնալով ավելի դժվարանում է ճիշտ հավասարակշռություն գտնել քաղաքացիների անձնական իրավունքների և հակաահաբեկչական միջոցառումների միջև: Այնուամենայնիվ, ըստ հոդվածագրի՝ վերջին շաբաթում Ֆրանսիան բավական ագրեսիվ կերպով է օգտագործում արտակարգ լիազորությունները կասկածյալներին բռնելու համար:
Բելգիայի վարչապետ Շառլ Միշելն առաջարկել է փոփոխություններ մտցնել Սահմանադրության մեջ, որոնք ոստիկաններին թույլ կտան առանց մեղադրանք ներկայացնելու կասկածյալներին պահել ոչ թե մեկ օրով, այլ 72 ժամով:
Իրավապաշտպանները Եվրոպային զգուշացնում են, որ այդպիսի միջոցառումները կարող են չափազանց հեռուն գնալ: Human Rights Watch իրավապաշտպան կազմակերպության ներկայացուցիչները կարծիք են հայտնել, որ անվտանգության ուժեղացումը չպետք է հանգեցնի չհիմնավորված ստուգումների անցկացման և խոսքի, տեղաշարժի և կրոնի ազատության սահմանափակումների: