Հռոմի պապ Ֆրանցիսկոսը կաթոլիկ եկեղեցուն կոչ է արել դադարել կառչել ֆունդամենտալիզմից և պահպանողականությունից՝ ի պատասխան խնդիրների, որոնց բախվում է Վատիկանը։ Նա հայտարարել է, որ եկեղեցին կարող է լինել «կեղտոտ», սակայն այն չպետք է ոչ մի դեպքում տարվի փողով և իշխանությամբ։ Այս մասին գրում է The Guardian պարբերականը։
Պապը նման հայտարարություն է արել Ֆլորենցիայում համաժողովի ժամանակ։ Նշվում է, որ ներկայում Վատիկանի առաջնորդները փորձում են բարեփոխել եկեղեցին, որը մշտապես բախվում է ֆինանսական խարդախությունների մեղադրանքների։
«Չպետք է լուծել հարցերը ֆունդամենտալիզմի, պահպանողականության, վարքի հնացած նորմերի վերականգնման օգնությամբ։ Այդ ամենն արդեն մշակութային առումով նշանակալի չէ։ Քրիստոնեական ուսմունքը փակ համակարգ չէ, որն ունակ չէ գեներացնել հարցեր և կասկածներ»,- ասել է նա եպիսկոպոսների հետ հանդիպմանը։
«Եկեղեցին կենդանի է։ Այն ունի մարմին, որը շարժվում է ու աճում»,- ասել է հովվապետը:
