Վրացական «Ռեզոնանսի» թերթի փոխանցմամբ՝ Ռուսաստանը ցանկանում է վերահսկողություն հաստատել Վրաստանում համացանցի նկատմամբ։ Էլեկտրաէներգիայի, ջրամատակարարման, օգտակար հանածոների, բջջային կապի ոլորտներից հետո ռուսական փողերը կարող են հայտնվել նաև վրացական ինտերնետային տիրույթում։
Խոսքը ռուսական «Վիմպելկոմ» ընկերության մասին է, որը ցանկանում է գնել «Կավկասուս օնլայն» ընկերությանը։ Նա տվյալ հարցով դեռ չի դիմել հաղորդակցությունների կարգավորման հանձնաժողովին։ «Վիմպելկոմի» կողմից «Կավկասուս օնլայնին» գնելու ցանկությունը թերթի հետ զրույցում հաստատել է «Կավկասուս օնլայնի» հիմնադիր Մամիա Սանադիրաձեն։ Իսկ ռուսական ընկերությունը որևէ մեկնաբանություն չի անում այդ հարցի շուրջ։
Մամիա Սանադիրաձեն հայտարարել է, որ եթե այդ գործարքը տեղի ունենա, և ռուսական ընկերությունը հայտնվի շուկայում, ապա նա կտիրի Եվրոպան Ասիայի հետ կապող մալուխին: «Դա Ռուսաստանին հնարավորություն կտա վերահսկելու բոլոր հեռախոսազանգերն ու նամակագրությունը։ Խոսքը 1200 կիլոմետր երկարության մալուխի մասին է, որով Վրաստանն ինտերնետ է ստանում Եվրոպայից և այն փոխանցում է Հայաստանին ու Ադրբեջանին։
Քաղաքական մոտիվացիաներ ունեցող կողմի ձեռքերում այն կարող է դառնալ տեղեկատվական հոսքերի վերահսկման հզոր մեխանիզմ։ Տվյալ մալուխը Սև ծովի հատակով անցկացվել է 2008 թվականին, և ինտերնետը Եվրոպայից մեզ մոտ ստացվում է ամենակարճ ճանապարհով։
Դրա օգնությամբ «Կավկասուս օնլայնը» ապահովում է դեպի Հայաստան ինտերնետի մատակարարման 85 տոկոսը, դեպի Ադրբեջան՝ մատակարարման 50 տոկոսը և դեպի Վրաստան՝ 55 տոկոսը։
Եթե «Վիմպելկոմը» գնի «Կավկասուս օնլայնը», ապա Ռուսաստանը կտիրի ամենամեծ ու կարևոր մայրուղուն և կկարողանա վերահսել երկիր մտնող հեռախոսազանգերն ու նամակագրությունը»,- ասել է նա։
