Star Citizen տիեզերական խաղի երկրպագուներից մեկը խաղում ներդրել է ավելի քան 30 հազար դոլար՝ հայտնում է internetua.com-ը: Խաղում Ozy311 մականունով հայտնի մասնակիցը պատրաստվում է շարունակել խաղի վրա գումար ծախսել:
«Ես բառացիորեն ամեն ինչ ունեմ: Ես խաղում ունեմ ամենաթանկարժեք լրակազմը, որն արժե 15 հազար դոլար: Թեև ես բոլորովին այդպես չեմ սկսել: Մի քանի տարի առաջ, երբ ես նոր էի սկսում խաղալ, ամեն տեսակի մանրուք գնում էի: Իսկ հետո տեսա, որ խաղն ավելի հասուն է դառնում: Պարզ դարձավ, որ դա հենց այն խաղն է, որի մասին ես երազում էի, և այն ինձ արագ ձգեց»,- պատմել է Քրիսը:
Star Citizen-ի նվիրյալ երկրպագուն պատրաստվում է նշել իր 40-ամյակը: Նա աշխատում է «շատ մեծ ընկերությունում», ուստի ազատ միջոցներ ունի, որոնք կարող է իրեն թույլ տալ խաղի վրա ծախսել:
«Ոմանք իրենց համար գնում են իսկական զբոսանավեր: Ես գնում եմ պիքսելային տիեզերանավեր: Կարծում եմ՝ ես մեծացել եմ այն համոզմունքով, որ ոչ ոքի պետք չէ դատապարտել, թե նա ինչպիսի ժամանցի վրա է ծախսում գումարը: Կյանքիս 10 տարին ես անցկացրել եմ World of Warcraft-ում: Այնտեղ ես հանդիպել եմ զարմանալի մարդկանց, ուստի անձամբ ես կարծում եմ, որ գեյմերների միության և սոցիալական ասպեկտների շնորհիվ խաղերը դառնում են ավելի, քան պարզապես խաղ: Ես գիտեմ, որ կշարունակեմ ծախսել Star Citizen-ի վրա»:
Star Citizen նախագիծն ամենահաջողված խաղերից է, որի համար ֆինանսավորումը հավաքել են իրենք՝ գեյմերները: Ներկայումս նախագծի համար հավաքված գումարը կազմում է ավելի քան 94 մլն դոլար:
