«Հոկտեմբերի 30-ի հանրահավաքը շատ կարևոր և բեկումնային նշանակություն է ունենալու: Կարևորը, որ կա հասարակական կարծիք, և մեր խնդիրն է կազմակերպել այդ «ոչ»-ը և ակտիվացնել մարդկանց»,- «Առաջին լրատվական»-ի հետ զրույցում ասաց «Չեք անցկացնի» նախաձեռնության անդամ Դավիթ Հովհաննիսյանը՝ անդրադառնալով հոկտեմբերի 30-ին իրենց կողմից Ազատության հրապարակում անցկացվելիք հանրահավաքին:
Անդրադառնալով «ոչ»-ի ճակատների տարբեր գործունեությանը՝ Դավիթ Հովհաննիսյանը նշեց. ««Ոչ»-ի ճակատի հռչակագրի տակ ստորագրած ուժերից որևէ մեկը չի հրաժարվել իր դիրքորոշումից, դուրս չի եկել դրանից, և այդ ճակատը ինչպես միասնական եղել է, այդպես էլ մնացել է: Բայց բնական եմ համարում, որ այդ ճակատի շրջանակներում կարող են ստեղծվել նոր ֆորմատներ»:
Նրա խոսքով՝ ընդդիմադիր քաղաքական ուժերն ունեն ռեսուրսների խնդիր, և բնական է, որ նրանք համատեղեն իրենց ռեսուրսները և միասնաբար պայքարեն. «Իսկ ընդդիմությունն ունի ռեսուրսների խնդիր, որովհետև մեր երկիրը ավտորիտար է: Բայց մենք ֆինանսական ռեսուրսների կարիք այնքան չունենք, որքան իշխանությունը՝ նրանք են փողեր բաժանողները»:
«Մենք ունենք ոչ թե «ոչ»-ի ձայն ստանալու, այլ այն պահելու խնդիր»,- եզրափակեց մեր զրուցակիցը:
