Անգլիայի հարավարևմտյան Հեմփշիր կոմսության Թիչֆիլդ գյուղի պատմաբանները կարծում են, որ Վիլյամ Շեքսպիրը երիտասարդ տարիներին աշխատել է տեղի դպրոցում՝ որպես ուսուցիչ: Այս մասին հայտնում է BBC-ն:
Այդ տեսությունը կարող է լույս սփռել մեծն դրամատուրգի կյանքի երեք տարիների վրա, որոնք դեռևս առեղծված են մնում պատմաբանների համար: Նրանց անհայտ է, թե ինչ է տեղի ունեցել Շեքսպիրի կյանքում 1589 թվականին՝ նրա երկվորյակների ծնվելու, և 1592 թվականին՝ Լոնդոնում նրա հայտնվելու ժամանակահատվածում:
Պատմաբան Քեն Գրոուվսը ենթադրում է, որ իրեն հաջողվել է պարզել այն տան նշանակությունը, որը գտնվում է Թիչֆիլդի աբբայությունից ոչ հեռու և հայտնի էր որպես Place-House Cottage: Գրոուվսի կարծիքով՝ Շեքսպիրի ժամանակ այդ տանը տեղակայված էր դպրոց:
Պատմաբանը վստահ է, որ քոթեջը պատկանել է Սաութհեմփթոնի երրորդ կոմս Հենրի Ռիզլին, որը եղել է Շեքսպիրի հովանավորներից մեկը:
Այդ փաստին Գրոուվսը հավելում է XVII դարի անգլիացի գրող Ջոն Օբրիի հավաստումն այն մասին, որ Շեքսպիրը դպրոցի ուսուցիչ է եղել: Գրողը հղում էր արել իր ժամանակակիցներից մեկի որդու վկայություններին:
