Նախօրեին՝ կեսգիշերին Հրաչյա Քոչար-Փափազյան խաչմերուկում վթարի ենթարկվելու հետևանքով «Արմենիա» բժշկական կենտրոն տեղափոխված նախկին պատգամավոր, ներկայումս ԲՀԿ շարքերը համալրած Զոհրաբ Զոհրաբյանի առողջական վիճակը չի փոփոխվել, նա վերակենդանացման բաժանմունքում է: Այս մասին «Առաջին լրատվական»-ին հայտնեցին «Արմենիա» բ/կ-ի վերակենդանացման բաժանմունքից:
Մեզ փոխանցեցին, որ նախկին պատգամավորի վիճակը բժիշկները գնահատում են կայուն ծանր: Բժիշկների վկայությամբ, Զոհրաբ Զոհրաբյանի մոտ գիտակցության էլեմենտներ: Բուժկենտրոնից հրաժարվեցին այլ մանրամասներ տրամադրել:
ԲՀԿ ներկայացուցիչը Արմենիա բ/կ էր տեղափոխվել ծայրահեղ ծանր վիճակում՝ կոմա, գանգուղեղի տրավմա, սուր շնչառական անբավարարություն ախտորոշմամբ:
Հիշեցնենք, որ ապրիլի 4-ին ուշ երեկոյան Հրաչյա Քոչար-Փափազյան խաչմերուկում վթարի էր ենթարկվել Զոհրաբ Զոհրաբյանը։ Իրար էին բախվել «Օպել Վեկտրա» մակնիշի 34VU251 պետհամարանիշի և «Չերրի» մակնիշի 09UL425 պետհամարանիշի ավտոմեքենաները դեռևս չբացահայտված հանգամանքներում: Ապրիլի 4-ին, ժամը 23:50-ի սահմաններում անմիջապես ավտովթարից հետո, «Արմենիա» բժշկական կենտրոնի վերակենդանացման բաժանմունք էր տեղափոխվել անգիտակից վիճակում գտնվող նախկին պատգամավոր, ԲՀԿ-ական Զոհրաբ Զոհրաբյանը:
