Երևանի ավագանու ընտրություններից առաջ, «Բարգավաճ Հայաստան» կուսակցության շտաբներում մարդկանց տվյալներ հավաքագրելու և ընտրակաշառքի խոստումների թեման օր օրի զարգացում է ապրում:
«Հայկական ժամանակը» վերջին համարներից մեկում գրել էր, որ «Հժ»-ի խմբագրություն են ահազանգում մայրաքաղաքի բնակիչներ՝ տարբեր վարչական շրջաններից, տեղեկացնելով, որ ԲՀԿ-ի անունից հանդես եկող մարդիկ են ներկայանում և առաջարկում պայմանագիր կապել՝ իրենց կուսակցությանն ընտրելու դիմաց 5000 դրամ ստանալու: Մինչ օրս ահազանգերը ստացվում էին ավելի շատ Դավիթաշեն և Նոր Նորք վարչական շրջաններից: Երեկ հերթական ահազանգերը մայրաքաղաքի Քանաքեռ-Զեյթուն և Արաբկիր վարչական շրջաններից էին: «ՀԺ»-ն որոշեց ինքը՝ Երևանի սովորական ընտրող ձևանալով, պարզել, թե իրականում ինչ է կատարվում քաղաքում տեղակայված ԲՀԿ շտաբներում: Դրանցից մեկում «ՀԺ» թղթակցի և շտաբի ներկայացուցչի միջև տեղի ունեցած խոսակցությունը ապացուցեց, որ «Բարգավաճ Հայաստան»-ը, այնուամենայնիվ, այս ընտրություններում նույնպես, մտադիր է ընտրողներին «անտեր» չթողնել ու խոսքի փոխարեն էս անգամ «գործ» անել: «ՀԺ»-ն ներկայացնում է երկխոսությունը:
– Ինձ հարևաններն են ասել փողի հետ կապված… Կարա՞նք ցուցակ կամ ընտանիքի ընտրողների թիվը բերենք:
– Դուք ո՞ր շենքում եք ապրում:
– Հացի խանութի: Իսկ ինչքա՞ն եք տալիս:
– Ախպերս, հլը մի ամիս կա: Մի հատ հասկանանք, թե ինչ ա, նոր կգաս, կպայմանավորվենք:
– Բայց մենք ի՞նչ պիտի անենք: Տնեցիների անունները բերե՞մ:
– Հա, անունները բերում ես, ուրիշ ոչ մի բան:
– Իսկ անձնագրերը՞:
– Մենակ անուն ազգանունները, մեկ էլ՝ հեռախոսի համար: Ուրիշ բան պետք չի: Դուք քանի՞ հոգի եք տանը:
– Չորս ընտրող:
– Չորս ընտրող…
– Հա: Ե՞րբ բերեմ անունները:
– Հիմա դեռ շուտ ա, ապեր: Մի 10 օրից:
– Ասում են հնարավոր ա, որ ուրիշներն էլ փող բաժանեն: Գոնե դուք ասեք, թե մոտավորապես ինչքան եք տալու, որ իմանանք անձնագրերը որտեղ տանենք:
– Ախպերս, մեզ դեռ ռեալ ոչ մի բան չեն ասել:
– Բայց կտա՞ք, եթե բերեմ:
– Ախպերս, բեր՝ էդ սաղ հարցերը մենք կլուծենք:
– Իսկ կարող ա՞ չտաք:
– Ապե, ըտենց տպավորություն ե՞նք թողնում:
– Գոնե մի 10 հազար տալու ե՞ք:
– Ապե, ես ոչ մի բան չգիտեմ հիմի:
Թե ինչպես է «Բարգավաճ Հայաստան» կուսակցությունը լուծելու ժողովրդի «սաղ հարցերը», պարզ կդառնա 10 օրից: Միայն հիշեցնենք, որ թերթին տված վերջին երկու ճեպազրույցներում կուսակցության քաղխորհրդի անդամ Նաիրա Զոհրաբյանը և կուսակցության մամլո խոսնակ Տիգրան Ուրիխանյանը հերքում էին, թե ԲՀԿ-ն ընտրակաշառք է բաժանում կամ բաժանելու է, ասում էին, որ ահազանգերն էլ՝ մրցակից ոչ բարեխիղճ քաղաքական ուժերի ձեռքի գործ է: «Բարեգործական ծրագրեր ընտրություններում դիվիդենտներ հավաքելու համար, օրենսդրորեն արգելված են»,- հնարավոր բարեգործության վերաբերյալ մեր հարցին ի պատասխան ասել էր տիկին Զոհրաբյանը: Իսկ հարցին՝ «Բարգավաճ Հայաստանի»՝ 160 և ավելի շտաբների միջոցով որևէ նվիրատվություն չի՞ լինելու, պատասխանել էր, որ դրանք բարեգործական շտաբներ չեն, այլ՝ նախընտրական շտաբներ են, որոնց խնդիրը մեկն է լինելու՝ ճշգրիտ կազմակերպել Երևանի ավագանու ընտրություններ: ԲՀԿ մամլո խոսնակ Տիգրան Ուրիխանյանն էլ ասել էր հետևյալը. «Չեմ հավատում, հերքում եմ և հորդորում եմ, որպեսզի գան և դիմեն ինձ: Կարծում եմ, որ դա ոչ թե բնակիչների կողմից ահազանգ է, այլ ոչ բարեխիղճ մրցակիցների կողմից սև քարոզչություն և վարկաբեկելու փորձեր»:
