ԲՀԿ առաջնորդի մամուլի խոսնակ Իվետա Տոնոյանն «Առաջին լրատվական»-ին փոխանցեց, որ իրենք կարող են Զոհրաբ Զոհրաբյանին միայն առողջություն մաղթել, այլ մեկնաբանություններ չեն կարող տալ. «Միակ բանը, որ մենք հիմա կարող ենք ասել, մեր գործընկերոջը շուտափույթ ապաքինում մաղթելն է: Մենք ցանկանում ենք, որ նրա առողջական վիճակը շատ արագ վերականգնվի, միայն այդքանը կարող ենք ասել, մնացածը իրավապահ մարմինների աշխատանքի տիրույթում է: Որևէ գնահատական այս պահին չի հնչելու»:
Այն հարցին, թե Գագիկ Ծառուկյանը չի՞ այցելելու Զոհրաբ Զոհրաբյանին, խոսնակը պատասխանեց. «Գագիկ Ծառուկյանն անընդհատ ռեժիմով տեղեկացվում է Զոհրաբ Զոհրաբյանի առողջական վիճակի մասին, ցանկացած զարգացումից ինֆորմացված է: Սակայն վերակենդանացման բաժանմունքում գտնվող անձանց տեսակցությունը նպատակահարմար չէ, դրա համար նա չի գնում հիվանդանոց»:
Հիշեցնենք, որ երեկ կեսգիշերին Հրաչյա Քոչար-Փափազյան խաչմերուկում վթարի է ենթարկվել նախկին ՀՀԿ-ական, ներկայումս ԲՀԿ շարքերը համալրած Զոհրաբ Զոհրաբյանը: Նա և վարորդը անգիտակից վիճակում տեղափոխվել են «Արմենիա» բժշկական կենտրոն:
