Երեկ առավոտյան Երևանի Սասունցի Դավիթ և Սուվորով փողոցների խաչմերուկում «Մերսեդես-Բենց» մակնիշի ավտոմեքենայի վարորդը վրաերթի է ենթարկել Ադրբեջանից քաղաքական ապաստան խնդրած «Ներազգային ազատագրական շարժում» նախաձեռնության ղեկավար Վահան Մարտիրոսյանի մորը՝ 68-ամյա Ջուլիետա Վիրաբյանին: Վերջինս ազդրի վզիկի կոտրվածքով տեղափոխվել է «Էրեբունի» բժշկական կենտրոն: Հետազոտությունից պարզ կդառնա՝ արդյոք Վիրաբյանը կենթարկվի՞ վիրահատության, թե՞ ոչ:
Մեզ հետ զրույցում տիկին Ջուլիետան պնդեց, որ պատահարը երկու կողմերի անզգուշության հետևանք է: «Բժիշկները հոգատար են, ես ինձ լավ եմ զգում, ամեն ինչ նորմալ վիճակում է, հույս ունեմ արագ ապաքինվել, անցնել ակտիվ կյանքի: Այստեղ ոչ մի քաղաքական բան չկա, պատահականություն է: Ես ընկա, կոտրվածք ստացա: Չեմ աշխատում լուրջ, կարելի է ասել՝ չեմ աշխատում, երբեմն օգնում են, թոշակառու եմ»,- ասաց Վահանի մայրը:
Իրեն վրաերթի ենթարկած «Մերսեդես-Բենց»-ի վարորդը չի դիմել փախուստի, օրվա մեջ մի քանի անգամ գալիս է տիկին Ջուլիետային այցելության: «Ուղղակի խնդրում եմ ինձ չանհանգստացնել, պարզվեց, որ սրտի պրոբլեմ էլ ունեմ, պետք է վերականգնվեմ»,- հավելեց նա:
Վահան Մարտիրոսյանի մայրը պնդում է, որ իրեն քաղաքական հետապնդումների չեն ենթարկել, թեև խոստովանում է, որ այս օրերին տանը չի մնացել, հարազատների և ընկերների տանն է անցկացրել: Հիմա էլ հիվանդանոցից դուրս գրվելուց հետո բարեկամներն ու ընկերները կխնամեն:
Տիկին Ջուլիետան որդու՝ Բաքու փախուստի մասին չցանկացավ խոսել: Մեր այն հարցին՝ արդյոք ամաչո՞ւմ է որդու արարքի համար, տիկին Ջուլիետան ասաց. «Չեմ ամաչում էն բանով, որ ինքը 15 տարեկան չէ, և ես իրեն տենց չեմ դաստիարակել, ինքը հայրենիքի համար շատ բան էր անում, չեմ հասկանում՝ ինչն իրեն դրդեց այդ քայլին»:
Որդու հետ այս ընթացքում որևէ կապ չի եղել. «Ինձ նեղացրել են, որևէ կապ չեմ ունեցել իրենց հետ, ես դեռ շոկի մեջ եմ»:
Հիշեցնենք, որ Ադրբեջան փախած Վահան Մարտիրոսյանը հանդես էր եկել ասուլիսով, որի ժամանակ նշել էր, որ ինքնակամ է տեղափոխվել Ադրբեջան և շնորհակալ է Ադրբեջանի կառավարությանը իրեն տրամադրած քաղաքական ապաստանի համար: «Հայաստանի իշխանությունները ստիպում էին ինձ ընդունել հանցավոր ռեժիմի պայմանները, բայց ես հրաժարվեցի»,- ասել էր նա իր ասուլիսում:
Հիշեցնենք նաև, որ Վահան Մարտիրոսյանը գողություն էր կատարել և գտնվում էր հետախուզման մեջ:
