Արգենտինայում փրկարարներին հաջողվել է ողջ գտնել 106 մարդու, որոնք անհետ կորած էին համարվում Լա Պլատա քաղաքում ուժեղ ջրհեղեղից հետո: ITAR-TASS-ի փոխանցմամբ՝ այս մասին հայտնել է Բուենոս Այրես մարզի անվտանգության և արդարադատության նախարար Ռիկարդո Կասալը:
Նա հայտնել է, որ ներկայում զոհերի թիվը կազմում է 51: «Մենք ստուգել ենք 5940 բնակելի տներ, զոհեր չեն հայտնաբերվել»,- նշել է պաշտոնյան: Կյանքն աստիճանաբար վերադառնում է բնականոն հուն: Ջրհեղեղից տուժած շրջաններում վերականգնվում է էլեկտրաէներգիայի և ջրի մատակարարումը: Իշխանությունները շարունակում են տուժածներին բաժանել խմելու ջուր, կաթ, սնունդ, տաք հագուստ և ներքնակներ:
Շարքային արգենտինացիները նույնպես փորձում են օգնել տուժածներին՝ բարեգործական կազմակերպություններ տանելով առաջին անհրաժեշտության ապրանքներ: Շատերը կորցրել են երկարամյա աշխատանքի արդյունքում ամբողջ ձեռք բերածը:
Առողջապահության նախարարության աշխատակիցները իրականացնում են գրիպի, հեպատիտի և կարմրախտի դեմ պատվաստում: Բուենոս Այրեսի նահանգապետ Դանիել Սցիոլին վստահեցրել է, որ տուժածներին կացարանների վերականգնման համար օգնություն կցուցաբերվի սուբսիդիաների և վարկերի միջոցով: Նա նաև հարկային մեղմացում է խոստացել տուժած շրջանների բնակիչների համար:
