Թուրքական Zaman թերթի փոխանցմամբ, Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) առաջնորդներից Ալի Հայդար Քայթանը, որը ծնունդով Թունջելիից (նախկին Դերսիմ) է, հանդես է եկել շոկային հայտարարությամբ.
«Կրոնի գլխավոր յուրահատկությունը հիմնված է հիշողության վրա: Դա վերաբերում է աղոթքներն անգիր անելուն: Օրինակ՝ ես ալևի եմ, սակայն անգիր գիտեմ նվազագույնը 10 սուրահ:
Քրդերը 1999 թվականից Մարմարա ծովի Իմրալը կղզում ցմահ բանտարկություն կրող PKK հիմնադիր Աբդուլլահ Օջալանին, որը հայտնի է «Ափո» մականվամբ, արդեն մարգարե են անվանում և, մասնավորապես, ժամանակակից Իբրահիմ: Միաստվածության ավանդույթներն Իբրահիմի ավանդույթներն են: PKK-ն շարունակում է պահպանել այդ ավանդույթները:
Apoculuk-ը (Ափոյություն) նոր կրոն է, որում ներառված են Օջալանի սոցիալիստական հայացքները: Այն իրենից ներկայացնում է կրոնների դրական կողմերից վերցված ու միահյուսված բարձր մակարդակի նոր կրոն»:
Հիշեցնենք, որ Օջալանը (թարգմանաբար` վրիժառու) հայտնի է որպես մարքսիստական գաղափարների կողմնակից:
Ինչ վերաբերում է Իբրահիմ մարգարեին, ապա նա Հին Կտակարանի Աբրահամն է։ Մահմեդական կրոնում նա համարվում է ամենակարևոր մարգարեներից մեկը և արժանանում է հատուկ պաշտամունքի:
Նրան է վերագրվում Քաաբայի կառուցումը Մեքքայում։ Մահմեդականների ասելով, Իբրահիմի ընտանիքը, այդ թվում՝ նրա որդի Իսմայիլը, Մեքքայի շուրջը բնակություն են հաստատել, նրանցից էլ սերել է ինքը՝ Մուհամմեդը։
