Բացահայտվել է ԲՀԿ խմբակցության քոչարյանական թևի հերթական ներկայացուցիչը. ԲՀԿ կուսակցության անդամ, պատգամավոր Հայկ Խաչատրյանը հայտարարել է, որ ինքը ուրախ կիներ, եթե «Ոչ»-ի քարոզչությունը ղեկավարեր Ռոբերտ Քոչարյանը, որ նա անպարտելի թեկնածու է, և նրա իշխանության օրոք ինքը շատ լավ բաներ է տեսել:
Հայկ Խաչատրյանը երեկ ԱԺ-ում շրջում էր ԲՀԿ խմբակցությունում քոչարյանական թևի ոչ ֆորմալ ղեկավար Վահե Հովհաննիսյանի հետ, և նրա գովքը առ Քոչարյան կարելի է բացատրել հենց այս հանգամանքով: Քոչարյանական թևը ուզում է ցույց տալ, որ փետրվարի 12-ին իշխանությունների վերահսկողության տակ անցած ԲՀԿ-ում կարող են լինել անակնկալներ, և այնտեղ կան Քոչարյանի իշխանության վերադարձի կողմնակիցներ, որոնք պատրաստ են ընդդիմանալ կուսակցության ընդհանուր գծին:
Մենք իհարկե վստահ ենք, որ այսօր ԲՀԿ-ն որոշում կկայացնի և Հայկ Խաչատրյանին կհեռացնի կուսակությունից, այլապես կստացվի, որ ԲՀԿ-ում կիսում են Խաչատրյանի կողմից Քոչարյանին նվիրված սազանդարության գոհարները: Հարցն այստեղ այն չէ, թե Հայկ Խաչատրյանը դեմ է սահմանադրական փոփոխություններին թե ոչ, հարցն այն է, որ լինելով ԲՀԿ անդամ՝ նա բացահայտորեն քարոզում է Քոչարյանի վերադարձի օգտին, և եթե ԲՀԿ-ն անմիջապես չհեռացնի նրան կուսակցության շարքերից. ապա ևս մեկ անգամ կհաստատվի այն վարկածը, որ ԲՀԿ-ն ստեղծվել է Քոչարյանի կողմից և այժմ էլ շարունակում է վերահսկվել նրա կողմից, իսկ կուսակցության գոյության բուն իմաստը Քոչարյանի վերադարձի ապահովումն է:
Արդեն իսկ տարակուսելի է, որ ԲՀԿ-ն մինչև հիմա չի արձագանքել Խաչատրյանի հայտարարություններին:
Հայկ Խաչատրյանի հայտարարությունները որքան որ ԲՀԿ ղեկավարության ձախողումն են, նույնքան էլ ԲՀԿ քոչարյանական թևի ղեկավար Վահե Հովհաննիսյանի հաջողությունը: Այդ թևում կան մի քանի բացահայտ քոչարյանականներ, և դրանց մասին հայտնի է ի սկզբանե: Բայց հիմա ստացվում է, որ Քոչարյանի վերադարձի կողմնակիցների թիվը ԲՀԿ խմբակցությունում ավելի մեծ է, և դա չի սահմանափակվում միայն բացահայտված քոչարյանականներով: Հայկ Խաչատրյանին կարող են հետևել ԲՀԿ խմբակցության այլ անդամների հայտարարություններ, ովքեր կարող են նույն տրամաբանությամբ ասել, որ իրենք դեմ են Սահմանադրության նախագծին, քանի որ կողմ են Քոչարյանի վերադարձին:
Իր այս քայլով Վահե Հովհաննիսյանը հերքել ԲՀԿ-ական մեկ այլ պատգամավորի Աբրահամ Մանուկյանի երեկ արված այն հայտարարությունը, որ ԲՀԿ-ն այսօր կողմ է սահմանադրական բարեփոխումներին, քանի որ, ի տարբերություն մինչև փետրվարի 12-ը ընկած ժամանակահատվածի, այսօր չունեն նախագահի թեկնածու: ԲՀԿ-ական Հայկ Խաչատրյանը հայտարարեց, որ ԲՀԿ-ի նախագահի իրական թեկնածուն Ռոբերտ Քոչարյանն է:
Հայկ Խաչատրյանը միակը չէ ԲՀԿ-ում, որ Ռոբերտ Քոչարյանին համարում է նախագահի արժանի թեկնածու և այդ պատճառով դեմ է սահմանադրական փոփոխություններին: Միայն Սահմանադրության նախագծի քվեարկության ժամանակ հնարավոր կլինի պարզել ԲՀԿ-ի քոչարյանական թևի ներկայացուցիչների իրական քանակը:
ԲՀԿ-ի Քոչարյանական թևը այսպիսի գործողություններով փորձում է ոգևորել Ռոբերտ Քոչարյանին և նրան ցույց տալ, որ ինքն ունի կողմնակիցների ստվար բանակ, ովքեր պատրաստ են ողջունել իր վերադարձը: Արդեն գրեթե մեկ ամիս խոսվում է այն մասին, որ ուր որ է՝ Ռոբերտ Քոչարյանը պետք է հանդես գա սահմանադրական փոփոխությունները մերժող հայտարարությամբ կամ հարցազրույցով, և ենթադրվում է, որ դրան պետք է հետևեն որոշակի գործողություններ: Բայց Քոչարյանի հայտարարությունը ուշանում է, և տեսակետ կա, որ նա մտահոգություն ունի, որ եթե հանդես գա այս փոփոխությունների դեմ հայտարարությամբ, ապա դրանով միայն կնպաստի Սահմանադրության նախագծի ընդունմանը: Մինչդեռ Քոչարյանի վերադարձի կողմնակիցները փորձում են ցույց տալ, որ դա ամենևին էլ այդպես չէ, և կա նրա վերադարձի հանրային պահանջ:
Իհարկե ծիծաղելի է մտածել, որ Հայկ Խաչատրյանի հայտարարությունը կարող է ազդել Քոչարյանի վրա և նրան ստիպել ավելի ակտիվ լինել, բայց եթե առաջիկայում լինեն ևս մի քանի նման հայտարարություններ, կարող է հասարակական պահանջի ֆոն ապահովվել: Ռոբերտ Քոչարյանը, խոսելով իր վերադարձի մասին, հայտարարել էր, որ դա կախված է մի քանի հանգամանքից: Հանգամանքներից մեկն էլ համապատասխան միջավայրի առկայությունն է, ինչի ձևավորմամբ էլ զբաղվում են Ծառուկյանի նախկին և Քոչարյանի ներկա քարոզիչները:
Լուսանկարը՝ Armtimes.com-ի
