Յոթ բնիկ կանադացիներ անցել են 1600 կմ ճանապարհ, մինչև Կանադայի մայրաքաղաք՝ ի նշան բողոքի ռեզերվացիայի վատ կենսապայմանների դեմ:
Ինչպես հաղորդում է BBC-ն, նրանք իրենց ճամփորդությունը սկսել էին 2012թ. հունվարին՝ Քվեբեկի հյուսիս-արևմուտքում գտնվող Ուափմագուսթուի հեռավոր համայնքից, որտեղ բնակվում են կրի հնդկացիները: Ցուցարարները հասել են մինչև Կանադայի մայրաքաղաք Օտտավայում գտնվող խորհրդարանի շենք:
Նրանց միացել է ավելի քան 200 մարդ, այդ թվում՝ 11-ամյա մի աղջնակ: Կանադայի վարչապետը համաձայնվել է բանակցել երկրի հնդկացիների առաջնորդների հետ:
Հնդկացիների խոսքով՝ գրեթե ոչինչ չի արվել բնակարանի և դպրոցների հետ կապված խնդիրները լուծելու համար: Բացի այդ՝ հնդկացիները կարծում են, որ շրջակա միջավայրի պահպանության մասին երկրի օրենքները խախտում են որսի և ձկնորսության իրենց իրավունքը:
