ՀՅԴ հարգարժան ներկայացուցիչ Աղվան Վարդանյանին վրդովվեցրել է մեր հրապարակումը ՀՅԴ-ի մասին, որտեղ հղում անելով Աղվան Վարդանյանի ասուլիսից լրատվամիջոցների մեջբերումներից մեկին՝ հարցրել էինք, թե «իսկ որն է Դաշնակցության իրական դեմքը»: Եվ ահա հարգարժան պատգամավորը հանդես է եկել հայտարարությամբ, որտեղ դժգոհում է, որ խեղաթյուրել ենք շարադասությունը, քանի որ ինքը ոչ թե հայտարարել է, որ Երևանի Ավագանու ընտրություններին քաղաքացիները կտեսնեն «Դաշնակցության իրական դեմքը», այլ ասել է, որ կտեսնեն «իրական Դաշնակցության դեմքը»: Ըստ պատգամավորի, շարադասությունը խախտելով (ենթադրում է միտումնավոր), հեղինակը «իրեն և այլոց հաճո» վերլուծություն է կատարել:
Աղվան Վարդանյանի մտքերի ընթացքը խեղելու միտում ամենևին չի եղել և չկա: Չի բացառվում, որ տարբեր լրատվամիջոցներ տարբեր ուշադրությամբ են սղագրում քաղաքական գործիչների մամուլի ասուլիսները, երբեմն կարևորություն չտալով բառերի հերթականությանը: Ըստ ամենայնի, հենց այդ դեպքի հետ է կապված նաև այս «խեղաթյուրումը»: Բայց դա կարծես թե բացարձակապես կարևոր չէ, որովհետև սա կարծես թե այն դեպքն է, որ «գումարելիների տեղափոխումից գումարը չի փոխվում» և տվյալ պարագայում, մեր հրապարակման հարցադրումները ևս անտրամաբանական չեն դառնում, որովհետև մեծ հաշվով կապ չունի՝ իրական Դաշնակցության մասին է խոսքը տվյալ դեպքում, թե Դաշնակցության իրական դեմքի: Տարբերությունն այստեղ կոսմետիկ է, իսկ էական հարցերը մնում են.
Իսկ ո՞ւր է եղել մինչև այժմ տեղի ունեցած ընտրություններում «իրական Դաշնակցությունը»:
Իսկ ո՞վ է կամ ի՞նչն է խանգարել, որ մինչև հիմա եղած ընտրություններում քաղաքացիներին «իրական Դաշնակցությունը» ներկայանա:
Եթե «Այս անգամ Երևանի Ավագանու ընտրություններում մեր քաղաքացիները տեսնելու են իրական Դաշնակցության դեմքը», ապա նախորդ անգամները կեղծ կամ իրական ո՞ւմ կամ ինչի՞ դեմքն են տեսել Դաշնակցության անվան տակ: Եթե տեսածը եղել է ոչ իրական կամ կեղծ Դաշնակցությունը, ապա ո՞ւր էր իրական Դաշնակցությունը մինչև հիմա: Կամ որ ընտրություններում է եղել իրական Դաշնակցությունը և որում՝ ոչ իրականը:
Այսինքն՝ տվյալ դեպքում խնդիրը ամենևին շարադասությունը չէ և բառերի հերթականությունը որևէ առանցքային փոփոխության չի ենթարկում իրավիճակը ըստ էության: Իրական խնդիրը շատ ավելի խորն է և վերաբերում է հայկական քաղաքական կյանքում կարևոր դերակատարություն ունեցած, գաղափարախոսական, արժեքային առաքելություն ունեցող, սակայն վերջին տասնամյակում այդ դերակատարումից մեծ քայլերով հեռացած կամ հեռացող քաղաքական ուժի ճակատագրին, ներկայի և ապագայի դերակատարությանը՝ և՛ Հայաստանի Հանրապետության, և՛ սփյուռքի մասշտաբով: