Մեծ Բրիտանիայի վարչապետ Դևիդ Քեմերոնը Սիրիայի գործող նախագահ Բաշար Ասադին և ԴԱԻՇ (Իրաքի և Շամի իսլամական պետություն) ահաբեկչական խմբավորման գրոհայիններին պատասխանատու է համարել տարածաշրջանում դրության և համաշխարհային միգրացիոն ճգնաժամի համար: Այս մասին հաղորդում է Reuters-ը:
«Եվրոպայում նման դրության համար ամենամեծ պատասխանատվությունը կրում են նախագահ Ասադը, ԴԱԻՇ-ի մարդասպանները և հանցախմբերը, որոնք իրականացնում են մարդկանց զազրելի առևտուրը»,- հայտարարել է վարչապետը:
Քեմերոնը համաշխարհային հանրությանը խնդրի «համընդհանուր լուծման» կոչ է արել` հայտարարելով բոլոր խնդիրների նկատմամբ կոշտ միջոցառումներ կիրառելու անհրաժեշտության մասին: Նա խոսել է նաև խնդրի լուծման անհնարինության մասին` Եվրոպայում հնարավորինս շատ մարդ ընդունելու ճանապարհով:
