Այսօր ողջ աշխարհում սփռված քրդերը նշում են Նավրուզը՝ գարունն ու նոր տարին ավետող իրենց տոնը: Ինչպես «Առաջին լրատվական»-ին փոխանցեց «Քուրդիստան» կոմիտեի նախագահ, քրդական համազգային կոնգրեսի պատգամավոր Ժենյա Ամիրյանը, տոնը նշվում է 612 թվականից, ունի շուրջ 2000 տարվա պատմություն: Նա ասաց, որ պատահական չէ տոնի՝ մարտի 21-ին նշելը: Այս օրը գիշերն ու ցերեկը հավասարվում են, իսկ դրանից հետո քրդերը սկսում են նոր օր, նոր տարի. «Մեզ համար այսօր գարնան առաջին օրն է, այսօր մենք շնորավորում ենք իրար, կազմակերպում միջոցառումներ: Տոնը իմաստավորված է ոչ միայն քուրդ ժողովրդի, այլև ողջ Միջագետքում ապրող ազգային փոքրամասնությունների համար»:
Տիկին Ամիրյանի փոխանցմամբ՝ տոնը իմաստավորված է, քանի որ իրենք ազատվել են բռնակալի լծից, բարբարոս պետությունների իշխանություններից և կարողանում են իրենց կրակը վառել. «Կրակը ազատության սիմվոլն է, Հայաստանի ամբողջ տարածքում քրդերը կրակ են վառում և ի լուր աշխարհի՝ իրենց ազատության օրն են նշում»:
Մեր զրուցակիցն ասաց, որ այսօր քրդական օջախներից անպակաս է երգն ու պարը, տանտիկինները պատրաստում են կլոճ, որի մեջ կոպեկ կամ ոսկեդրամ ենք դնում, և ում ընկավ դա, ուրեմն տարին նրա համար բարեհաջող կլինի. «Ասեմ նաև, որ այսօր Դիարբեքիրում մոտ մեկ միլիոն ժողովուրդ է տոնում այս օրը: Ստամբուլում, Անկարայում և Թուրքիայի քրդաշատ տարածքներում տոնը նշվում է մեծ շուքով»:
