Հարյուր հազարավոր քրդեր մասնակցում են Նովրուզի առիթով հանրահավաքին, որը տեղի է ունենում Դիարբեքիրից 20 կմ հեռավորության վրա գտնվող Բագլար քաղաքի ծայրամասի այգում: Կազմակերպիչները, որոնք քրդամետ «Խաղաղություն և ժողովրդավարություն» կուսակցությունից են, սպասում են 1.5 մլն մասնակցի: Հանրահավաքին կմասնակցեն քրդեր՝ ժամանած ողջ երկրից և արտերկրից: Հանրահավաքին հավատարմագրվել են 500 լրագրողներ, նրանցից 100-ից ավելին՝ օտարերկրացի: Ոմանք կարծում են, որ հանրահավաքը կարող է դառնալ Թուրքիայի Հանրապետության պատմության մեջ ամենաբազմամարդը:
Հրապարակում ամենուր կարմիր, կանաչ և դեղին դրոշներ են (դեռևս գոյություն չունեցող Քրդստան պետության դրոշը): Այնտեղ չկա Թուրքիայի և ոչ մի դրոշ:
Տրիբունան զարդարված է ազատության համար պայքարում զոհված անջատողական ակտիվիստների ցուցապաստառներով: Այս մասին հայտնում է «Գոլոս Ռոսիի» ռադիոկայանի կայքը:
Օրվա գլխավոր իրադարձությունը պետք է դառնա Քրդստանի աշխատավորական կուսակցության բանտարկված առաջնորդ Աբդուլլահ Օջալանի՝ զինաթափման ուղերձը: Տարբեր տվյալներով՝ էթնիկ քրդերի թիվը Թուրքիայում տատանվում է 15-25 միլիոնի սահմաններում:
Իշխանությունները հայտնել են, որ հասարակական կարգի պահպանման համար մոբիլիզացվել է 5000 ոստիկան, սակայն դժվար է պատկերացնել, թե ինչպես կարող են նրանք դիմակայել հարյուր հազարավոր ցուցարարներին՝ անկարգությունների բռնկման դեպքում:
