Այս շաբաթվանից մեկնարկելու է քաղաքական ուժերի հանդիպումը Սերժ Սարգսյանի հետ՝ քննարկելու Սահմանադրական փոփոխությունների նախագիծը։ «Առաջին լրատվական»-ը նախագահի խոսնակ Վլադիմիր Հակոբյանից հետաքրքրվել է, թե որ կուսակցություններն են ստացել հրավեր, և կոնկրետ երբվանից է մեկնարկելու այն։ Սակայն Հակոբյանը հույժ գաղտնի պահեց՝ հիշեցնելով, որ անցած շաբաթ արդեն հաղորդագրությունը տարածել են, որ այս շաբաթվանից է սկսվելու։ Տրամաբանեց, որ եթե ասել են՝ այս շաբաթվանից, ուրեմն արդեն ուղարկվել են հրավերները։
Կուսակցական ուժերից, սակակն, տեղեկացանք, որ հրավեր դեռ չեն ստացել։ ԲՀԿ ղեկավար Նաիրա Զոհրաբյանն ասաց, որ դեռ չեն ստացել հրավեր, իսկ եթե ստանան, ապա կառուցողական քննարկմանը մասնակցելուն դեմ չեն։
Նախկինում Սերժ Սարգսյանի հետ հանդիպելու կոմպլեքս չունեցող «Ժառանգությունում» այս անգամ իրավիճակ է փոխվել, չի բացառվում, որ նախկին հանդիպմանն ուղղված քննադատությունների տարափն ու հեգնանքը ստիպել է վերանայել հանդիպման որոշումը։
Մեր տեղեկություններով՝ այստեղ հակված չեն հանդիպման գնալու, բացի Ռուբիկ Հակոբյանից, որի կարծիքն այս անգամ հնարավոր է՝ հաշվի չառնեն։ «Ժառանգությունում» հանդիպման մասին հստակ կհայտարարեն հրավերն ստանալուց հետո, որը դեռ իրենց էլ չի ուղարկվել։
Ենթադրվում է, որ Սերժ Սարգսյանի հետ քաղաքական ուժերի հանդիպումները սկսկվեն չորեքշաբթիից, քանի որ վաղը Երևանի պետական համալսարանում հանդիպում է սպասվում Վենետիկի հանձնաժողովի հետ: Այն տևելու է մեկ օր: Քաղաքական ուժերից այդ հանդիպմանը հրավիրված է մասնակցելու 7-8 ներկայացուցիչ։
