ԱՄՆ-ը 5 մլն դոլար դրամական պարգև է սահմանել տեղեկության համար, որը կօգնի բռնել «Ալ-Շաբաբի» ահաբեկչական կազմակերպության երկու անդամներին՝ Օմար Շաֆիկ Համամիին և Ջեհադ Սերվան Մուստաֆային: ITAR-TASS-ի փոխանցմամբ՝ այս մասին հայտնել է Պետդեպը:
Նրանք երկուսն էլ ԱՄՆ քաղաքացիներ են և ներառված են Հետաքննությունների դաշնային բյուրոյի կազմած ցուցակում, որում ընդգրկված անձանց բռնելը առաջնահերթ է:
Իրավապահ մարմինների տվյալներով՝ Համամին ներառված է սոմալիական «Ալ-Շաբաբի» ղեկավար կառույցում: Խմբավորումը դեռևս 2008 թվականին Պետդեպի կողմից ներառվել է ահաբեկչական կազմակերպությունների ցուցակում:
Ենթադրվում է, որ Համամին ներկայում գտնվում է Սոմալիում, որտեղ 2006 թվականին տեղափոխվել էր ԱՄՆ Ալաբամա նահանգից:
Իսկ Ջեհադ Մուստաֆան նախկինում բնակվել է Կալիֆոռնիայի Սան Դիեգո նահանգում, Սոմալի է տեղափոխվել 2005-ին: Խմբավորման մեջ նա պատասխանատու է օտարերկրացի գրոհայինների պատրաստման և ԶԼՄ-ների հետ աշխատանքի համար:
Երկուսի դեմ հեռակա կարգով առաջադրվել են մի շարք մեղադրանքներ՝ կապված նրանց ահաբեկչական գործունեության հետ:
