Ազգային ժողովի փոխնախագահ Հերմինե Նաղդալյանը մարտի 20-ին հանդիպում է ունեցավ ԵՊՀ միջազգային հարաբերությունների ֆակուլտետի ուսանողների հետ, որոնք իրենց ուսումնական պրակտիկան են անցկացնում խորհրդարանում:
ՀՀ ԱԺ հասարակայնության հետ կապերի բաժնից «Առաջին լրատվական»-ին հայտնում են, որ նկատելով, որ ուսանողների մեծ մասը իգական սեռի ներկայացուցիչներ են՝ Հերմինե Նաղդալյանը զրույցը սկսեց իրեն հաճախ տրվող հարցի պատասխանով՝ արդյոք կնոջ համար իրատեսական է համատեղելը ընտանիքն ու քաղաքական ակտիվ գործունեությունը, առհասարակ՝ կարիերան: ԱԺ փոխնախագահը սեփական օրինակով փաստեց, որ կինը կարող է կայացած լինել թե ընտանիքում, թե իր երկրի հասարակական-քաղաքական կյանքում, եթե դրսևորում է կամք և շրջապատված է քաղաքակիրթ մարդկանցով, որոնք չեն առաջնորդվում «կամ…կամ»-ի բանաձևով:
Անդրադառնալով միջազգայնագետի մասնագիտությանը՝ ԱԺ փոխխոսնակը նշել է, որ հատկապես նորանկախ պետության համար չափազանց կարևոր է լավ դիվանագետներ ունենալը. մեծ են սպասելիքներն արդիական հայացքներ ունեցող նոր սերնդից: Երիտասարդներին Հերմինե Նաղդալյանը խորհուրդ տվեց ճիշտ կշռել և օգտագործել իրենց հնարավորությունները:
Ուսանողների խնդրանքով՝ Ազգային ժողովի փոխնախագահն անդրադարձել է նաև Հայաստանի ներքին և արտաքին քաղաքականությանն առնչվող մի շարք հարցերի:
