«Առաջին լրատվական»-ի զրուցակիցն է Երևանի ավագանու կազմում «Բարգավաճ Հայաստան» խմբակցության ղեկավար Գուրգեն Գասպարյանը:
– Պարոն Գասպարյան, անցած 4 տարիներին Երևանի ավագանու կազմում ԲՀԿ խմբակցությունն ի՞նչ առաջարկներ է ներկայացրել, որոնք իրականացվել են:
– Այս պահին չեմ կարող ասել, բայց ինչպես կարող է ԲՀԿ-ն անմասն մնա նման բաներից: Մենք 10-ից ավելի նախաձեռնություններ ունենք, մոտ 40-50 առաջարկներ ունենք, որոնք կյանքի կոչված են: Կարող եմ ասել, որ այն կանոնակարգը, որով այսօր աշխատում է Երևանի ավագանին, ԲՀԿ խմբակցության նախաձեռնությունն է եղել, մենք ենք գրել ու ներկայացրել: Բայց գործեր արել ենք:
– Իսկ քաղաքը բարեկարգելու հետ կապված ի՞նչ առաջարկություններ եք արել, և դրանցից որո՞նք են իրականացվել:
– Օրինակ` անցած տարի Ազատություն և Փափազյան փողոցների կրպակաշարերի դեպքերի հետ կապված մենք մեծ ավանդ ենք ունեցել, ոտքի ենք կանգնել տեղերում և չենք թողել, որ դրանք ապամոնտաժեն: Հետո իրավական մասով էլ կարողացել ենք Կարապետյանին [նախկին քաղաքապետ Կարեն Կարապետյան.- խմբ.] այդ հարցի շուրջ բերել-հասցնել այն մակարդակի, որ 243 կրպակ էլ դրված էր ապամոնտաժման, բայց մեր թեթև ձեռքով չթողեցինք: Կրպակատերերի հետ ենք հանդիպել, շրջայց ենք կատարել, բնակիչներ ենք ընդունել, շատ աշխատանք ենք կատարել:
– Բայց կրպակների ապամոնտաժման այդ դեպքերի ժամանակ ավելի շատ նկատելի էր ՀԱԿ-ի և «Ժառանգության» անդամների պայքարը: Ձեր պայքարը չի երևացել:
– Երևի մեր սխալն է եղել, որ մամուլի հետ լավ չենք աշխատել, բայց դա մյուս անգամ կուղղենք: Ստեփան Սաֆարյանին կարող եք հարցնել, և կտեսնեք, թե ԲՀԿ-ի ավագանու հետ ինչ գործունեություն են ծավալել: Հետո, երբ փողոցային առևտուրը արգելեցին, այդ ժամանակ էլ է գործ կատարվել: Օրինակ` 1996թ. ձևավորված բակային առևտրի սկզբունքը չխախտելու համար մինի-շուկաների ստեղծման գաղափարն ենք տվել, որ մարդիկ իրենց ապրանքը վաճառելու տեղ ունենան: Գիտեք, որ շուկաները սեփականատերեր ունեն, և խեղճուկրակ տատին չի կարող մտնել այնտեղ ու իր կանաչին վաճառի:
– Իսկ ավելի գլոբալ ի՞նչ առաջարկություններ եք ներկայացրել: Օրինակ` առաջարկե՞լ եք ապամոնտաժել անօրինական կամ տհաճ կառույցները, կամ գոնե կասեցնել դրանց կառուցումը, որոնք խաթարում են Երևանի տեսքը:
– Բազմիցս բարձրացրել ենք հարցեր, որ պետք է պարզեցվի համակարգը, որ քաղաքացին դիմի և կարճ ժամանակում շինթույլտվություն ստանա: Այսօր քաշքշուկներն այնքան շատ են, այնքան թղթաբանություն կա, որ մարդիկ այստեղից զզված են գնում, դրա համար էլ դիմում են ապօրինի շինարարությունների: Դրանք կառավարության որոշումներով են կանոնակարգվում, որոշակի իմաստով քաղաքապետարանն էլ մեղք չունի: Քաղաքապետարանի մեղքն այն է, որ ընթացակարգերը դյուրացնելու համար կառավարությանը դիմի: Մենք մեծ գործ ենք կատարել ծխախոտի և ոգելից խմիչքների վաճառքի տուրքերի հետ կապված: Ժամանակին նման տուրքերի համար Երևանում 3 գոտի սահմանվեց, և այդ ապրանքների վաճառքի թույլտվության տուրքը մի քանի անգամ թանկացավ: Իսկ մենք մեր պայքարի միջոցով կարողացել ենք Երևանը դարձնել 4 գոտի, որ տնտեսվարողները կարողանան ավելի քիչ վճարել: Մենք դեռ պայքարում ենք, որ դա ավելի քչանա:
– Երևանի հիմնական խնդիրները կանաչ տարածքների բացակայությունը և տհաճ շինությունների առկայությունն է: Դուք պայքարե՞լ եք, որ ծառեր չհատվեն և նման շինությունները չկառուցվեն:
– Երևանում շատ խնդիրներ կան, որոնք քննարկվել են ավագանու հանձնաժողովների նիստերում: Օրինակ` «Մոսկվա» կինոթատրոնի հետևի շենքը, որ ցանկանում էին օտարել, կհիշեք, դրա պայքարում էլ անմասն չենք եղել: Ինչ ասեմ, աշխատանքներ եղել են թե քաղաքաշինության, թե այլ ոլորտներում:
– Երբևէ քաղաքապետարանի ինչ-որ որոշման ընդդիմացե՞լ եք և չեք կարողացել հաջողության հասնել: Կամ դուք ինչ-որ լավ առաջարկ ներկայացրե՞լ եք, բայց քաղաքապետարանը չի ընդառաջել:
– Չեմ կարող այս պահին ասել, բայց շատ հարցեր են եղել, որոնց դեմ ենք քվեարկել: Նույն այդ գոտիավորման դեպքում ասել ենք` չընդառաջեք, դեմ կքվեարկենք: Ի վերջո, մենք ունենք մեր նախընտրական ծրագիրը, մեր սկզբունքները, որին միշտ հավատարիմ ենք եղել:
– Աշխատանքային ի՞նչ հարաբերություններ ունեք ՀՀԿ խմբակցության հետ, հա՞շտ եք: Առաջին տարիներին տարաձայնություններ կային, և ԲՀԿ խմբակցության նախորդ ղեկավարն այդ տարաձայնությունների արդյունքում լքեց պոստը:
– Անհաշտություններ ընտանիքներում էլ են լինում, ես համարում եմ, որ Երևան քաղաքը բոլորինս է, ոչ ՀՀԿ-ինն է, ոչ էլ` ԲՀԿ-ինը: Երևանը երևանցունն է: Եվ երևանցուն ինչ խնդիր հուզում է, ավագանին՝ որպես նրա կողմից ընտրված մարմին, պետք է բարձրացնի այդ հարցերը: Որևէ մեկը եթե համաձայն չի լինի, մենք նրանց հետ հաստատ անհաշտ կլինենք: ՀՀԿ խմբակցության հետ լինում են բուռն քննարկումներ, երբ ինչ-որ հարցի դեմ ենք լինում, լինում է, որ համաձայն ենք: Այնպես չէ, որ մենք նրանց ամեն ասածին դեմ ենք, կամ՝ նրանք մեր ամեն ասածին կողմ են:
– Գագիկ Ծառուկյանն անցած շաբաթ քննադատական արտահայտություններ հնչեցրեց Երևանի խնդիրների հետ կապված: Ասաց, որ Երևանը չի սահմանափակվում Աբովյան-Թումանյան խաչմերուկով, մյուս հատվածներին էլ պետք է ուշադրություն դարձնել: Ի՞նչ չի արվել, որ եթե ԲՀԿ-ն հաղթեր՝ կաներ:
– Անցած տարի մենք մեծ աղմուկ բարձրացրեցինք, որ ասֆալտապատումը կատարվում է հիմնականում Երևանի կենտրոնական փողոցներում, ծայրամասերում նույնպես կենտրոնական փողոցների վրա է շեշտը դրվում: Երկրորդային և երրորդային փողոցներն ահավոր վիճակում են: Երևանը ոնց որ 21-րդ դարի գյուղ էլ չլինի: Եթե ԲՀԿ-ն հաղթած դուրս գա, կտրուկ փոփոխություններ կանի: Այսինքն` այն փոփոխությունները, որ Գ. Ծառուկյանն է ասում, ակնառու կկատարվեն: Թեկուզ ներդրողներ կգտնենք` արտաքին կամ ներքին: 21-րդ դարի մայրաքաղաք ենք, աղբահանության մեծ խնդիր ունենք, աղբի վերամշակման գործարանի խնդիր ունենք:
– Միգուցե միջոցնե՞րը չեն բավարարում Ձեր նշած խնդիրները լուծելու համար:
– Ես այդ հարցին այլ կերպ եմ նայում՝ միջոցները կարելի է տնտեսել, կարելի է ներդնողներ գտնել, որ քաղաքի համաչափ զարգացում ապահովվի:
– Այդ դեպքում ինչու չեն խնայում միջոցները կամ ներդրողներ ինչու չեն գտնում: Խնայելու ցանկությո՞ւն չկա, որ երկրորդային և երրորդային փողոցներն ասֆալտապատեն կամ լուսավորեն:
– Ցանկության կան ու չկան բոլորին տեսանելի է, ես խնդիրների մասին եմ խոսում: Այդ ասֆալտապատման և լուսավորության նման բազմաթիվ այլ հարցեր կան:
– Ձեր կարծիքով` ԲՀԿ-ն այս անգամ Երևանի ավագանու ընտրություններին մասնակցելով՝ քաղաքական ի՞նչ խնդիր է ցանկանում լուծել: Ուզում է հաղթել, որ հետո քաղաքական ավելի՞ լուրջ գործընթացներ ծավալի, չէ՞ որ ՀՀ բնակչության մոտ կեսը մայրաքաղաքում է ապրում:
– ԲՀԿ-ն գործի կուսակցություն է, եկեք դրանով եզրափակվենք: Սա ՏԻՄ ընտրություն է, որը ուղիղ համեմատականի մեջ է ժողովրդի կենցաղային խնդիրների հետ, և դրանք պետք է լուծել: Քաշքշուկներ չառաջացնել, որ մարդիկ քաղաքապետարան մտնելիս հաճույք ստանան և հավատան, որ իրենց խնդիրները լուծում կստանան:
