Սիրիայում, որտեղ շուրջ երկու տարի շարունակվում է զինված հակամարտությունը կառավարական ուժերի և զինված ընդդիմության միջև, իրավիճակը գնալով փոխվում է հօգուտ ընդդիմադիրների, ընդ որում օտարերկրյա ինտերվենցիայի հավանականությունը նախկինի պես շարունակում է փոքր մնալ: Այս մասին ասվում է Լոնդոնի Ռազմավարական հետազոտությունների միջազային ինստիտուտի (International Instuture for Strategic Studies, IISS) հրապարակած «Ռազմական բալանս-2012» ամենամյա զեկույցում:
Ինչպես հաղորդում է Agence France-Presse-ը, IISS-ի կարծիքով՝ սիրիական հակամարտությունը շարունակում է մնալ միջազգային անվտանգության կենտրոնական խնդիրներից մեկը: Այդ ոլորտում կարևոր խնդիրներ են նաև Չինաստանի ավելացող ռազմական հզորությունը և այլ ասիական երկրների պաշտպանական ծախսերի մշտական աճը:
Փաստաթղթում նշվում է, որ, չնայած սիրիացի ապստամբների որոշակի հաջողություններին, երկրում կարող է ձևավորվել փակուղային իրավիճակ, երբ կողմերից ոչ մեկ չի կարողանա վճռական առավելության հասնել: Կառավարական ուժերը կարող են հաջողության հասնել ընդդիմության խմբավորումների դեմ, եթե վերջիններս հրաժարվեն պարտիզանական կռիվներից և փորձեն մշտական հսկողության տակ վերցնել երկրի խոշոր քաղաքները:
Եվս մեկ գործոն, որ կարող է խանգարել ընդդիմության հաղթանակին, փորձագետները նշում են դրանում ուժեղ քաղաքական և ռազմական ղեկավարության բացակայությունը, ինչը կարող է պառակտում առաջացնել ապստամբների շրջանում: Ընդ որում, այդ դեպքում բանակը կլինի ամենաուժեշը մյուս զինված խմբավորումների շրջանում:
Ինչ վերաբերում է ուժերի և միջոցների համաշխարհային ռազմական բալանսին, IISS-ը նշում է, որ 2012թ. պատմության մեջ առաջին անգամ Ասիայի երկրների ռազմական ծախսերը գերազնացել են Եվրոպայի ռազմական ծախսերը: Վերլուծաբանները հատուկ շեշտում են Չինաստանի բանակի մոդեռնիզացումը, որի սպառազինության մեջ սեպտեմբերին մտավ երկրի պատմության մեջ առաջին ավիակիրը:
Իր ռազմական հզորությունը շարունակում է ավելացնել նաև Հյուսիսային Կորեան, որը, IISS-ի գնահատականներով, ունի քիմիական զենքի աշխարհում երրորդ զինանոցը: Պխենյանի պլուտոնի պաշարները կարող են բավարարել 12 միջուկային մարտագլխիկի համար, ասվում է զեկույցում:
