«Ժառանգություն» կուսակցության առաջնորդ Րաֆֆի Հովհաննիսյանը «Ժողովուրդ»-ի հետ զրույցում հավաստիացրեց, որ ինքը չի կարող ասել, թե ինչու է ՀՀ ոստիկանապետ Վլադիմիր Գասպարյանն իր նկատմամբ այդքան բարեհաճ: «Ես չգիտեմ, սա սիրո, բարևի և միասնության հեղափոխություն է, որը թույլ չի տալիս մի կաթիլ արյուն, որը հավատում է քաղաքացու, պաշտոնյայի, ոստիկանի համերաշխությանը, և հենց այդ սկզբունքներով տանելու ենք մեր պայքարը դեպի հաղթանակ»,-«Ժողովուրդ»-ի հետ զրույցում նշեց Հովհաննիսյանը:
– Պարոն Հովհաննիսյան, Սերժ Սարգսյանի և ՌԴ նախագահ Վլադիմիր Պուտինի պաշտոնական հանդիպման ժամանակ Պուտինը, շնորհավորելով Ս. Սարգսյանին, ասաց, թե 60 տոկոս և ավելի ձայն հավաքելը շատ լավ արդյունք է: Ըստ Ձեզ՝ Պուտինն ինչո՞ւ է «բարձրացրել» Ս. Սարգսյանի հավաքած տոկոսները:
– Գոսպոդին Պուտին օշիբայետսյա: Ռուսաստանը առաջին հերթին, մինչև Ֆրանսիա, Եվրամիություն, Ամերիկա, բոլորը միասին պետք է հասկանան, որ ով ճանաչի կեղծիքի, ստի, վախի վրա հիմնված ընտրությունը, ինքը կանգնում է հայ ժողովրդի դեմ: Եվ սա վերաբերվում է ոչ միայն Ռուսաստանի նախագահին, այլև բոլորին: Իրենք կարող են 60 ասել կամ 50, ուղղակի մի բան հստակ է՝ փետրվարի 18-ին հայ ժողովուրդը Չարենցի միասնության պատգամով բերեց իր հաղթանակը, և ոչ մեկը, որքանով հարգելի մարդ է կամ մեծ գործընկեր, ինքը իրավունք չունի խեղել հայ ժողովրդի իրականությունը սեփական երկրում:
– Ըստ Ձեզ՝ ինչո՞ւ Ս. Սարգսյանն իր պաշտոնական առաջին այցը կատարեց Մոսկվա:
– Ես դա չեմ մեկնաբանում, դա հարցրեք իր խոսնակին:
– ՀՀ ոստիկանապետ Վլադիմիր Գասպարյանը ևս Ձեզ այցելեց Ազատության հրապարակում, ինչո՞ւ է նա այդքան բարեհաճ Ձեր նկատմամբ:
– Դա նույնպես դիմեք պարոն ոստիկանապետին:
– Բոլոր ժամանակներում ոստիկանապետերն ընդդիմադիր թեկնածուների նկատմամբ շատ վատ վերաբերմունք են ունեցել, անգամ 2008թ. նախկին ոստիկանապետ Ալիկ Սարգսյանը հայտարարել էր, որ ինքը «հեղափոխությունը կխեղդի օրորոցում»: Դուք միակ ընդդիմադիր թեկնածուն եք, որ նման վերաբերմունքի է արժանացել ոստիկանապետի կողմից, ո՞րն է պատճառը:
– Ես չգիտեմ, սա սիրո, բարևի և միասնության հեղափոխություն է, որը թույլ չի տալիս մի կաթիլ արյուն, որը հավատում է քաղաքացու, պաշտոնյայի, ոստիկանի համերաշխությանը, և հենց այդ սկզբունքներով տանելու ենք մեր պայքարը դեպի հաղթանակ:
–Տեղեկություններ կան, որ Վլ. Գասպարյանը մշտապես Ձեզ հետ զրույցում հորդորում է ամեն ինչ անել օրենքի սահմաններում, հակառակ դեպքում սպառնում է ձերբակալել Ձեր ակտիվիստներին: Ճի՞շտ են այդ տեղեկությունները:
– Նման խոսակցություն չի եղել, ոչ:
– Քաղաքական դաշտի գրեթե բոլոր ներկայացուցիչներն այցելել են զեզ, զրուցել, ինչո՞ւ չէ, նաև խորհուրդներ են տվել՝ հետագա քայլերի հետ կապված: Ըստ Ձեզ՝ ինչո՞լ մինչև այսօր Ձեզ չի այցելում ՀԱԿ առաջնորդ Լևոն Տեր–Պետրոսյանը:
– Դա հարցրեք իրեն, իր խոսնակին: Ոչ մի խոչընդոտ չկա, ես բաց եմ բոլորի առջև, նաև նրա:
– Նշվում է նաև, որ 9 օր հետո Հայաստան է գալու Ձեր հայրը՝ Ռիչարդ Հովհաննիսյանը, և իշխանական կուլիսներում տեղեկություններ են շրջանառվում, որ նա Ձեզ ֆինանսական օժանդակություն է բերելու:
– Իմ ընտանիքը մշտապես մեզ զորակցել է, մշտապես մեր կողքին է եղել, և ես շնորհակալ եմ նրանց դրա համար: Հնարավոր է՝ համագումարի համար հայրս և մայրս գան, բայց ոչ երբեք ֆինանսավորում կատարելու համար: Իրենք իրենց ամբողջ կյանքը նվիրել են ինձ ու մեր ընտանիքին: Մեր ամբողջ կյանքի ընթացքում մեր կողքին են եղել, դա հերթական սուտն է: Խնդրում եմ, հղում կատարեք, թե որտեղից եք այդ տեղեկությունները ստացել: Դրանք չճշտված լուրեր են:
– Լավ, իսկ ճի՞շտ են այն տեղեկությունները, որ Ձեր երեխաները ԱՄՆ քաղաքացիներ են, ինչպես նաև Ձեր որդին, որը հացադուլ է հայտարարել ու Ձեր կողքին է նստում:
– Ոչ, ճիշտ չեն:
– Շնորհակալություն, Աստված Ձեզ պահապան:
Հ. Գ. ՀՀ նախագահի ընտրություններից հետո ծավալված գործընթացներից թերևս ամենահետաքրքիրը ՀՀ ոստիկանապետ Վլադիմիր Գասպարյանի այցն է Րաֆֆի Հովհաննիսյանին: Իհարկե, այն պաշտոնապես մատուցվեց որպես աստվածավախ ոստիկանապետի մարդասիրական քայլ, այնուամենայնիվ հասկանալի է, որ այն ավելի շատ և առաջին հերթին քաղաքական քայլ է: Գաղտնիք չէ, որ ընտրությունների կազմակերպիչ հանդես եկած Գասպարյանը նաև Սերժ Սարգսյանի մերձավորագույն շրջապատի ներկայացուցիչ է և շատ կարևորագույն որոշումների կայացման գործում ազդեցիկ գործիչ: Ուստի չի բացառվում, որ նա հստակ խնդրով էր այցի գնացել Րաֆֆուն, ինչի մասին, բնականաբար, երկու կողմն էլ լռում են: