Ռուսական TASS լրատվական գործակալության փոխանցմամբ` ԱՄՆ կառավարությունը, ամերիկյան բանկերն ու հիմնադրամները ընդհանուր առմամբ 1 միլիարդ դոլար կհատկացնեն Աֆրիկայում բիզնեսի զարգացմանը, որը ներկայումս վերելքի մեջ է:
Այդ մասին Քենիայի մայրաքաղաք Նայրոբիում անցկացվող Ձեռնարկատիրության գլոբալ գագաթնաժողովում հայտարարել է ԱՄՆ նախագահ Բարաք Օբաման. «Աֆրիկան աշխարհի ամենաարագ զարգացող տարածաշրջաններից մեկն է: Մարդիկ դուրս են գալիս աղքատությունից: Միջոցների մի մասը նախատեսված է կանանց ու երիտասարդներին աջակցելու համար, որոնց համար ավելի բարդ է սեփական բիզնեսը սկսել մայրցամաքում: Եթե թիմի կեսը չի խաղում, ապա դուք մեծ խնդիր ունեք»:
Քենիայի նախագահ Ուխուրու Քենիատան իր հերթին հայտարարել է, որ Աֆրիկան ամենաերիտասարդ ու անսահմանափակ հնարավորություններով առավել հեռանկարային գոտի է աշխարհում:
Քենիական այցի ժամանակ Օբամային ուղեկցում է ավելի քան 20 օրենսդիր և 200 գործարար: Օբաման Քենիայից մեկնելու է Եթովպիա, ուր գտնվում է Աֆրիկյան միության շտաբ-բնակարանը:
