Առաջիկայում երգչուհի Քրիստինե Պեպելյանը կմեկնի ԱՄՆ՝ ներկայացնելու իր «Շնորհակալ եմ» խորագրով մենահամերգը, որը 2012-ի սեպտեմբերի 28-ին տեղի է ունեցել Կարեն Դեմիրճյանի անվան մարզահամերգային համալիրում։ Այս ծրագրի նախապատրաստական աշխատանքները երգչուհին սկսել է մարտից, և դրանք տևել են շուրջ յոթ ամիս։
«Ենթադրում եմ, որ նույնքան ժամանակ էլ այս մենահամերգի համար հարկավոր կլինի, քանի որ նախապատրաստական աշխատանքներ կան անելու: Այնտեղ կունենամ հանդիպումներ մարդկանց հետ, ովքեր հետաքրքրված են պրոյեկտով»,- ասաց Քրիստինե Պեպելյանն «Առաջին լրատվական»-ի հետ զրույցում։ Նա նշեց, որ հիմա Լոս Անջելեսում երեք կազմակերպություններ հետաքրքրված են մենահամերգի ծրագրով, և հանդիպումների ընթացքում կպարզվի՝ ով կիրականացնի դրա կազմակերպումը:
Հարցին, թե արդյո՞ք սպասվում են նոր երգեր, արդյո՞ք այն երգիչները՝ Արման Հովհաննիսյան, Թաթա Սիմոնյան, Հայկո և ուրիշներ, ովքեր մասնակցել են մենահամերգին, նույնպես կմեկնեն ԱՄՆ, երգչուհին պատասխանեց, որ այս պահին դժվար է որևէ կոնկրետ բան ասել, քանի որ դա պայմանավորված է նրանով, թե արտիստներից ով որքան զբաղված կլինի:
Քրիստինե Պեպելյանը նաև նշեց, որ հնարավոր է՝ լինեն նոր երգեր, հնարավոր է՝ ծրագիրը նույնը մնա:
Իսկ այն հարցին, թե ինչու հենց ԱՄՆ, երգչուհին պատասխանեց, որ հայկական ամենաակտիվ համայնքներից մեկը Լոս Անջելեսինն է։ Ըստ նրա՝ այդ համայնքը միշտ սիրով սպասում է. «Ես չեմ հիշում որևէ համերգ, որ ես դժգոհ մնացած լինեմ Լոս Անջելեսի հայությունից: Մեր հանդիսատեսը ամեն տեղ ջերմ է, բայց այս համերգով ուզում եմ ստարտը լինի շրջագայությունների։ Հետագայում Եվրոպայի մի քանի քաղաքաներում նույնպես կլինեն մենահամերգներ: Ի դեպ, կան եվրոպական երկրների կազմակերպիչների հետ բանակցություններ»,- ասաց նա:
Նշենք, որ Քրիստինե Պեպելյանի մենահամերգի DVD տեսագրության հետ կապված աշխատանքներն ավարտված են, և ապրիլի 7-ից երգչուհու երկրպագուներն այն կարող են ձեռք բերել։
