Ճանապարհային ոստիկանությունը դեռևս չի արձագանքել «Դո՛ւրս մեր գրպանից» քաղաքացիական նախաձեռնության պահանջներին, որոնք հունիսի 16-ին անցկացված ավտոերթ-ակցիայի շրջանակում գրավոր փոխանցվել էին ՃՈ պետի տեղակալին և ՃՈ իրավաբանական վարչության պետին: Այս մասին «Առաջին լրատվական»-ի հետ զրույցում տեղեկացրեց նախաձեռնության անդամ Արսեն Պետրոսյանը:
Նա հիշեցրեց իրենց պահանջները՝ վերացնել կարմիր գծերը, տեսախցիկները կամ ներդնել ՃԵԿ, սահմանել խախտումների, պատժամիջոցների բալային մեխանիզմ և նախկին տուգանքների և դրանց վրա եկած տույժերի նկատմամբ մասնակի համաներումը դարձնել ամբողջական:
ՃՈ ներկայացուցիչները խոստացել են ծանոթանալ պահանջներին, ընդհանուր քննարկել և ներկայացնել իրենց դիրքորոշումը: Արսեն Պետրոսյանը նկատեց, որ ոստիկանությունը մեկ ամսվա ընթացքում գուցե չի պատասխանել՝ ելնելով 2 հիմնական պատճառներից. նախ՝ ՃՈ պետի փոփոխությունը, երկրորդ պատճառն այն է, որ լրացել է տուգանքների «մայր» գումարի վճարման ժամկետը։
«Ցանկանում էին տեսնել՝ որքան վարորդներ կվճարեն, հասկանալ իրավիճակը, բողոքի ծավալները»,- մանրամասնեց Ա. Պետրոսյանը:
Նա նաև ընդգծեց, որ վերջին մեկ ամսվա մեջ ակցիա չեն իրականացրել, որպեսզի չխանգարեն Բաղրամյանի պայքարին։ «Վերսկսելու ենք ակցիաները, հիշեցնելու ենք մեր պահանջները, հետևողական ենք լինելու դրանց լուծմանը»,- շեշտեց Ա. Պետրոսյանը:
Ըստ նրա՝ տեսախցիկների տուգանքներն արվում են երկակի ստանդարտներով, դրանք միայն վարորդների գրպանը մտնելու համար են։ Նրա խոսքով՝ փորձը ցույց է տվել, որ երթևեկության կանոնակարգմանը դրանք չեն նպաստում. «Գումար կորզելու տարատեսակ միջոցներով վարորդների գրպանը մտնելու արատավոր պրակտիկային պետք է վերջ դնել, միանշանակ պետք է լինի բալային սանդղակ, սահմանվեն չափորոշիչներ՝ վարորդական իրավունքից ժամանակավոր և ընդհանրապես զրկելու համար, ներդրվի դասընթացային պատժի և վարչական աշխատանքի տեսքով այլընտրանքային պատժամիջոցների համակարգ, և տեսենք՝ ինչպես չի կանոնակարգվի երթևեկությունը»,- նկատեց նա:
Անդրադառնալով շարժական արագաչափերի կիրառմանը՝ Արսեն Պետրոսյանը նկատեց՝ եթե դրանք չվերածվեն վարորդների համար ծուղակի և օբյեկտիվ կանոնակարգեն երթևեկությունը, հիշեցնեն թույլատրելի արագության մասին, ապա դրանց կիրառումը կարող է դրական ազդեցություն ունենալ:
