Տոնի առիթով Մայր Աթոռ Սուրբ Էջմիածնում առավոտյան կատարվեց հանդիսավոր ժամերգություն: Ժամերգության ավարտից հետո Մայր Տաճարի առջև, հանդիսապետությամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, կատարվեց Անդաստանի արարողություն, ապա օրհնվեցին ուռենու ճյուղեր և բաժանվեցին ներկա հավատացյալ ժողովրդին:
Այնուհետև կատարվեց մանուկների օրհնության հատուկ կարգ: Ամենայն Հայոց Կաթողիկոսն եկեղեցականաց դասի հետ օրհնեց Մայր Աթոռ Սուրբ Էջմիածնի Էօռնեկյան դպրոցի աշակերտներին և արարողությանը ներկա մանուկներին, ապա երեխաներին նվերներ բաժանվեցին:
Նույն օրը Մայր Տաճարում տոնի առիթով մատուցվեց Սուրբ Պատարագ: Պատարագիչն էր Մայր Աթոռ Սուրբ Էջմիածնի վանորեից տեսուչ Տ. Արտակ եպիսկոպոս Տիգրանյանը: Արտակ Սրբազանն իր քարոզում անդրադարձավ Ծաղկազարդի խորհրդին ու մեր կյանքում նրա այսօրվա պատգամին: ՙՏոնական այս օրերին եկեք մեր ունեցած և փայփայվող հոգևոր ազնվագույն սլացքով, մեր վեհ ու վսեմ ձգտումներով, ամբողջական անձնվիրությամբ դիմավորենք Հիսուսին: Ձիթենու կամ ուռենու ոստերով սկսած և հրաշափառ Ս. Հարությամբ ավարտվող ավագ շաբաթն ապրենք և ապրեցնենք խորհրդավոր ու հպարտ, որով յուրաքանչյուր օր և դրվագ մեր սրտերից սեր հոսեցնելու պատճառ և խթան կդառնա:
Եվ Նա, Ով մահվամբ մահը կործանեց, Իր կենարար արյան վտակներով խաչը սրբագործեց, տառապանքի ճանապարհն անտրտունջ հատեց` սերն ապրեցնելու համար, թող լուսավորի մեր մտքերն ու սրտերը, որ կարողանանք գիտակցաբար պատրաստ լինել և աղաղակել` Օվսաննա այնտեղ, որտեղ մեծարելու և գնահատելու վեհ և արժանի գործեր կան: Այսօր այս մտածումներով և խոհերով խնդրենք մեր Տեր Հիսուս Քրիստոսին, որ խաչի անցած իր ճանապարհը շնորհ և օրինակ դարձնի մեր կյանքի բոլոր ճանապարհներին՚,- իր քարոզում նշեց պատարագիչ Սրբազան Հայրը:
Հավարտ Սբ. Պատարագի Նորին Սրբության հանդիսապետությամբ վերստին կատարվեց մանուկների օրհնության կարգ:
