«Միսս տիեզերք 2014» գեղեցկության մրցույթի հաղթող Պաուլինա Վեգան հրաժարվել է վերադարձնել անցած տարի նվաճած թանկարժեք թագը՝ ասելով, որ ինքը շարունակելու է այն սոցիալական աշխատանքը, որն իրականացնում էր «Միսս տիեզերք» ճանաչվելուց հետո: Այս մասին հայտնում է english.alarabiya.net-ը:
Նշվում է, որ կոլումբացի գեղեցկուհին նաև սուր քննադատության է ենթարկել մրցույթի կազմակերպիչ Դոնալդ Թրամփին, ով վերջերս հայտնվել էր լուրջ սկանդալի կենտրոնում՝ մեքսիկացի ներգաղթյալների հասցեին վիրավորական արտահայտությունների համար:
Տեղեկանալով Վեգայի կողմից հնչեցված քննադատության, ինչպես նաև հաղթողի թագը չվերադարձնելու որոշման մասին՝ Թրամփը սոցցանցերից մեկում գեղեցկուհուն «երկերեսանի» է անվանել:
««Միսս տիեզերք» Պաուլինա Վեգան քննադատում է ինձ ապօրինի ներգաղթյալների մասին ճշմարտությունն ասելու համար, բայց միևնույն ժամանակ նա չի ցանկանում վերադարձնել թագը. երկերեսանի»,- գրել է միլիարդատերը, ով ԱՄՆ նախագահի առաջիկա ընտրությունների թեկնածու է:
Հիշեցնենք, որ ավելի վաղ Թրամփն ասել էր, որ նախագահ ընտրվելու դեպքում ԱՄՆ-ի ու Մեքսիկայի սահմանին մեծ պատ կկառուցի, որպեսզի թմրամոլ ու հանցագործ մեքսիկացիներն այլևս չկարողանան հատել իր երկրի սահմանը:
