Գազպրոմը Թուրքիայի հետ հակասությունների պատճառով հրաժարվել է Սև ծովով անցնող 4 գազատար գծերի տեղադրումից: Այս մասին հայտարարում է ՌԻԱ Նովոստին՝ հղում կատարելով իրավիճակին մոտ կանգնած աղբյուրներին:
Լրատվամիջոցի տեղեկացմամբ՝ աշխատանքները դադարեցվել են, խոսք է գնում նախագծի նոր ուղղությունների մասին: Գազպրոմում այս տեղեկությունը չեն մեկնաբանում: Ինչպես տեղեկացվում է, Գազպրոմը կսառեցնի Հարավային միջանցքի գազատար խողովակների ներդրումները, որոնցով գազը պետք է մատակարարվեր Թուրքական հոսքին: Խոսքը կարող է գնալ գազի մինչև 32 մլրդ կուբամետր նվազեցման մասին:
Լրատվամիջոցները այս որոշումը պայմանավորում են նրանով, որ Թուրքիայի հետ հակասությունների պատճառով Գազպրոմը որոշել է Սև ծովով գազատար գծերի անցկացման փոխարեն Բալթիկ ծովով երկու նոր գազատար գիծ անցկացնել: Այս փոփոխությունը հնարավորություն կտա խուսափել Ուկրաինայի միջով տրանզիտից:
