Ադրբեջանական APA լրատվական գործակալության հաղորդմամբ, առաջիկա տարիներին կարող է նոր նավթամուղ կառուցվել Ադրբեջանից դեպի Սև ծով: Այս մասին հայտարարել է Ադրբեջանի էներգետիկայի ու արդյունաբերության փոխնախարար Գյուլմամեդ Ջավադովը.
«Ադրբեջանի տարածքով նավթի տարանցման ավելացման պատճառով առաջիկա տարիներին պլանավորված է Ադրբեջանի տարածքում կառուցել նոր նավթամուղ, որը կձգվի մինչև Սև ծով:
2015 թվականին Կասպյան տարածաշրջանում նավթի արդյունահանումը կազմելու է 100-115 միլիոն տոննա: Դրա համար էլ ակնկալվում է, որ մինչև 2025 թվականը տարածաշրջանում կկառուցվեն նոր խողովակաշարեր, որոնց թողունակությունը 80 միլիոն տոննայով կգերազանցի ներկայիս խողովակաշարերի հզորությունը:
Կանխատեսվում է, որ Ադրբեջանի տարածքով տարանցվող նավթի ծավալը կաճի 25-60 միլիոն տոննայով: Դրա համար էլ կարող է կառուցվել Ադրբեջան-Սև ծով նոր նավթամուղ»:
Հիշեցնենք, որ ներկայումս ադրբեջանական (ինչպես նաև միջինասիական) նավթը Սև ծով է հասնում երկու երթուղով. «Բաքու-Նովոռոսիյսկ» նավթամուղ և «Բաքու-Սուփսա» նավթամուղ (փոխարինել է խորհրդային ժամանակաշրջանում կառուցված «Բաքու-Բաթում» նավթամուղին):
