«Առաջին լրատվական»-ի զրուցակիցն է ԵԱՀԿ Մինսկի խմբի ֆրանսիացի նախկին համանախագահ Ժակ Ֆորը։
– Պարոն Ֆոր, արդեն հեռվից ինչպե՞ս եք գնահատում Լեռնային Ղարաբաղի հակամարտության կարգավորման գործընթացը:
– Որքան հնարավոր է՝ ես ուշադիր հետևում եմ իրադարձություններին և ցանկանում եմ, որ գտնվի ԼՂ խնդրի կարգավորման խաղաղ լուծում: Դա հարկավոր է բնակչության համար, որպեսզի շփման գծի երկու կողմերն էլ ապրեն խաղաղության մեջ:
– Տպավորությունն այնպիսին է, որ գնալով ավելի է հեռանում հակամարտության խաղաղ կարգավորումը:
– Իմ գործընկերներն աշխատում են լիարժեք կերպով, և հուսով եմ՝ ինչ-որ բան կլինի:
– Իսկ ի՞նչն է խանգարում խաղաղ կարգավորմանը ավելի շուտ հասնելու համար:
– Երբ ես ակտիվորեն աշխատում էի, երկու կողմերից էլ շատ հարցեր կային, բայց շահագրգիռ կողմերը պիտի փորձեն դրանք լավագույնս հաղթահարել:
– Հայաստանի արտգործնախարար Էդվարդ Նալբանդյանը հայտարարեց, որ Ադրբեջանը չի ընդունում Մինսկի խմբի հինգ հայտարարությունները: Համաձա՞յն եք նրա հետ:
– Մինսկի խումբը սեղանի վրա է դրել խաղաղ կարգավորման շատ ողջամիտ տարրեր, բայց դուք գիտեք, որ դրանք վերաբերում են խնդրի բոլոր կողմերին: Եվ այնպես չէ, որ վերցնեն մի սկզբունքը ու մոռանան մեկ այլ սկզբունք: Մենք ակնկալում ենք, որ կողմերը դրանք կընդունեն ու կիրականացնեն, ինչը շատ կարևոր է:
– Դուք գիտեք, որ անցած տարի Ադրբեջանը մի քանի անգամ դիվերսիոն հարձակումներ իրականացրեց Հայաստանի սահմաններին: Ինչպե՞ս եք գնահատում այդ գործողությունները:
– Պետք է խաղաղ կարգավորման սկզբունքները կիրառվեն: Դուք գիտեք, որ և ֆրանսիական կողմը, և Ֆրանսիայի նախագահը դա չափազանց կարևորում են:
– Կարծիք կա, որ Ռուսաստանին ձեռնտու չէ ԼՂ հակամարտության կարգավորումը:
– Ես դա չեմ մեկնաբանի: Թույլ տվեք հիշեցնել, որ Ռուսաստանը Մինսկի խմբի լիարժեք անդամ է:
