ՀՀ ԱԳ նախարարության լրատվական ծառայությունից հաղորդում են, որ երեկ Բեռլինում տեղի է ունեցել Աֆղանստանին նվիրված արտգործնախարարների մակարդակով Հյուսիսատլանտյան Դաշինքի Խորհրդի ընդլայնված հանդիպումը, որին մասնակցել են ՆԱՏՕ-ի անդամ և Աֆղանստանում միջազգային անվտանգության ուժերին մասնակցող շուրջ հինգ տասնյակ երկրների արտաքին քաղաքական գերատեսչությունների ղեկավարներ:
Ելույթ ունենալով նախարարական հանդիպմանը Հայաստանի արտաքին քաղաքական գերատեսչության ղեկավարը վերահաստատել է ՀՀ հանձնառությունը շարունակելու օժանդակությունը Աֆղանստանում խաղաղության, անվտանգության, կայունության և ներազգային համերաշխության հաստատման ուղղությամբ գործադրվող ջանքերին: էդվարդ Նալբանդյանը նաև շնորհակալություն է հայտնել Գերմանիայի իշխանություններին Աֆղանստանում հայկական զորախմբի տեղակայման և ծառայությանն առնչվող հարցերում արդյունավետ համագործակցության համար:
Բեռլինում Էդվարդ Նալբանդյանը նաև հանդիպում է ունեցել Գերմանիայի կանցլեր Անգելա Մերկելի արտաքին քաղաքականության և անվտանգության հարցերով գլխավոր խորհրդական Քրիստոֆ Հոյսգենի հետ: Զրուցակիցները մանրամասն անդրադարձել են հայ-գերմանական բարեկամական հարաբերությունների առավել ամրապնդման ուղիներին, քննարկեցին միջազգային և տարածաշրջանային խնդիրների լայն շրջանակ:
Անդրադարձ է կատարվել անցյալ տարի ՀՀ Նախագահի Գերմանիա կատարած այցի ընթացքում ձեռք բերված պայմանավորվածությունների կատարման ընթացքին՝ համագործակցությունը նոր բովանդակությամբ համալրելու նպատակով:
Երկուստեք գոհունակությամբ նշվել է, որ երկու երկրների միջև հաստատված է բարձր մակարդակի քաղաքական երկխոսություն, արդյունավետորեն զարգանում է փոխգործակցությունը երկկողմ և բազմակողմ ձևաչափերով, ստեղծվել է ամուր իրավա-պայմանագրային դաշտ, ընդլայնվում են գործարար կապերը, համագործակցությունը՝ մշակութային և կրթական ոլորտներում:
Քրիստոֆ Հոյսգենի խնդրանքով նախարար Նալբանդյանը ներկայացրել է ղարաբաղյան հիմնախնդրի կարգավորման գործընթացի վերջին զարգացումները:
Էդվարդ Նալբանդյանի հաջորդ հանդիպումը Ավստրալիայի Քեվին Ռուդի հետ է եղել:
Նախարարները գոհունակությամբ նշել են, որ միջազգային ֆորումների շրջանակներում իրենց հանդիպումներն արդեն ավանդական են դարձել, և դա լավ հնարավորություն է` քննարկելու երկուստեք հետաքրքրություն ներկայացնող բազմաթիվ հարցեր:
Նախարարները մանրամասն քննարկել են ղարաբաղյան հիմնախնդրի հանգուցալուծմանն ուղղված միջազգային հանրության ջանքերը:
Համաժողովի շրջանակներում Էդվարդ Նալբանդյանը նաև կարճատև զրույցներ է ունեցել մի շարք երկրների իր գործընկերների հետ:
