«Առաջին լրատվական»-ի զրուցակիցն է ԲՀԿ քաղխորհրդի անդամ, ԱԺ համանուն խմբակցության պատգամավոր Վահան Բաբայանը:
–Պարո՛ն Բաբայան, երեկ «Բարգավաճ Հայաստան» կուսակցությունը նախագահական ընտրությունների վերաբերյալ հայտարարություն տարածեց, որի մեջ նշված չէ Ձեր հետագա անելիքների մասին՝ հետընտրական զարգացումների հետ կապված: Կասե՞ք՝ ինչ դիրքորոշում ունեք:
-Մենք երեկ քաղաքական խորհրդում քննարկել ենք և այդ հայտարարությունն ենք տարածել, ես հայտարարությունից զատ պաշտոնապես ավելացնելու որևէ բան չունեմ:
-Այդուհանդերձ, հայտարարության մեջ նախագահական ընտրությունների հետ կապված մտահոգություն կար, հնարավո՞ր է միանաք Րաֆֆի Հովհաննիսյանին:
-Երբ կուսակցությունը որոշում կայացնի, այն ժամանակ էլ կքննարկենք, այս պահին կուսակցությունը որոշում է կայացրել և հայտարարություն է հրապարակել, հայտարարության մեջ նշված են բոլոր կետերը՝ այդ թվում մեր կոչը, մեր հորդորն իշխանություններին, որը մենք արդեն բարձրաձայնել ենք, անձնական կարծիք ես չունեմ:
-Հանրապետական կուսակցության պատգամավոր Մարգարիտ Եսայանը կարծիք է հայտնել, որ հիմա խորհրդարանում քաղաքական օրակարգը թելադրում են «Ժառանգությունն» ու Հանրապետական կուսակցությունը: Համամի՞տ եք այդ կարծիքին:
-Ձեր հարցը մի փոքր անհասկանալի է, յուրաքանչյուր կուսակցություն իր քաղաքական օրակարգն է թելադրում անկախ իր զբաղեցրած մանդատներից, սակայն եկեք չմոռանանք, որ «Բարգավաճ Հայաստան» կուսակցությունն իր մեծությամբ ԱԺ-ում երկրորդն է, «Բարգավաճ Հայաստանը» չի կարող չթելադրել օրակարգը: Չմասնակցել նախագահական ընտրություններին դեռևս չի նշանակում, որ «Բարգավաճ Հայաստանը» չունի սեփական քաղաքական օրակարգ: Մենք երբևէ չենք մասնակցել նախագահական ընտրություններին, բայց խորհրդարանական ընտրությունների արդյունքում ցույց տվեցինք, որ մենք ի զորու ենք ձևավորել քաղաքական օրակարգ, ունենք բարձր վարկանիշ և կարող ենք ի նպաստ մեր երկրի շատ բան անել: Իսկ մնացած բոլոր քաղաքական հայտարարությունները կամ որոշ կուսակցությունների ներկայացուցիչների հայտարարություններն իրենց անձնական կարծիքներն են, և ես դա չեմ պատրաստվում մեկնաբանել:
–Իսկ չե՞ք մտածում, որ նախագահական ընտրություններին չմասնակցելով՝ թեկնածու չառաջադրելով և որևէ մեկին չսատարելով կուսակցության վարկանիշն անկում ապրեց, և ի՞նչ եք կարծում՝ Ձեր ընտրազանգվածն ո՞ւմ ձայն տվեց:
-Մեր անդամներն ազատ են եղել իրենց ընտրության հարցում, մենք ուղղորդումներ չենք արել: Հիմա նման գուշակություն անելը անշնորհակալ գործ կլինի, եկեք զերծ մնանք նման գնահատականներից: Հայաստանում դեռ կլինեն համարժեք իրադարձություններ, որոնց ԲՀԿ-ն կմասնակցի, և մարդիկ, ովքեր կասկածում են ԲՀԿ-ի բարձր վարկանիշ ունենալու մեջ, ևս մեկ անգամ կհամոզվեն, որ մենք հաստատակամ ենք մեր ծրագրերի մեջ և կհամախմբենք մեր վստահության քվե տվող մարդկանց:
–Հնարավոր չե՞ք համարում, որ մարդիկ հիասթափված լինեին. մինչև վերջին օրը որևէ մեկի առաջադրմանն էին սպասում:
-Սպասելը և կարծիք ունենալը, իհարկե, մեր հասարակության կամ քաղաքացիների իրավունքն է, բայց կուսակցության ու անդամների որոշումն այլ բան է: Ես չէի ցանկանա մեկնաբանել, որովհետև դա ոչ ճշգրիտ վերլուծություն կլինի, մենք չենք կարող հենվել վերլուծությունների վրա: Անհատական, մասնավոր կարծիքների վրա հիմնվելով՝ ոչինչ ասել չեմ կարող, կապրենք, կտեսնենք, վստահ եմ, որ ԲՀԿ-ն իր վարկանիշը գնալով բարձրացնելու է:
–Մայիսի հինգին Երևանում ՏԻՄ ընտրություններ են լինելու, այս անգամ որևէ ձևաչափով ԲՀԿ-ն մասնակցելո՞ւ է:
-Ես ասեմ, որ ԲՀԿ-ն ո՛չ խորհրդարանական խմբակցությունում, ո՛չ քաղաքական խորհրդում նման քննարկում չի անցկացրել, երբ նման քննարկում լինի՝ թե ինչ ֆոմատով և ում տեսքով ենք մասնակցելու, ես Ձեզ կտեղեկացնեմ:
–Հնարավո՞ր է հետընտրական այս շրջանում, ՀԱԿ-ի և ՀՅԴ-ի հետ համախմբվելով, մասնակցեք:
-Ես չեմ կարծում, որ կարելի է նման գնահատական տալ, զերծ կմնամ բացառելուց կամ չբացառելուց. շուտով մեր քայլերի մասին կտեղեկանաք:
-Պարո՛ն Բաբայան, տարբեր համալսարանների մի խումբ ուսանողներ դասադուլ են հայտարարել, Դուք այն խրախուսո՞ւմ եք, հնարավո՞ր է ԲՀԿ-ի երիտթևից մասնակցողներ էլ լինեն:
-Ճիշտն ասած՝ ուսանողների և բոլոր քաղաքացիների իրավունքն է հանդես գալ բողոքներով , դասադուլներով, գործադուլներով , դա Հայաստանի Հանրապետության յուրաքանչյուր քաղաքացու իրավունքն է: Տվյալ դեպքում ես չեմ կարող ասել, մեր կուսակցությունից քանի անդամ է դասադուլին մասնակցել կամ մասնակցել է, թե ոչ: Ես, իհարկե, կարծում եմ, որ առաջնահերթը մեր երիտասարդության համար կրթություն ստանալն է, բայց դա նաև չի խանգարում, որ արգելեն մարդկանց այդ իրավունքի իրացումից: Կարծում եմ՝ դատապարտելի ոչինչ չկա:
–Իսկ նրանց պահանջը՝ ընտրություրններն անվավեր ճանաչելը, Ձեզ համար ընդունելի՞ է
-Մենք էլի վերադառնում ենք այն խոսակցությանը, ինչից սկսեցինք, ես, իհարկե, հասկանում եմ Ձեր ցանկությունը. որպես լրագրող, մի բառ ավելի շատ պատկերացնել մեր դիրքորոշման վերաբերյալ, բայց ևս մեկ անգամ ստիպված եմ ասել, որ մեր հայտարարության տեքստի մեջ բոլոր իրադարձությունների վերաբերյալ մեր կարծիքն արտացոլված է: Հատ առ հատ՝ սևով սպիտակի վրա գրված է այն բոլոր հորդորները, որոնք մենք առաջ ենք քաշել:
–Հայտարարության մեջ ասված չէ, հնարավո՞ր է ապագայում Սերժ Սարգսյանին շնորհավորե՞ք, թե՞ Գագիկ Ծառուկյանի Հայաստանում չլինելու հետ կապված դեռ որոշում չկա:
-Դուք շատ լավ ասացիք, երբ որ պարոն Ծառուկյանը կվերադառնա Հայաստան, կլինի խորհրդակցություն, կլինի նիստ, որտեղ կքննարկվեն այդ հարցերը, ես չեմ կարող այլ բան ասել, մնացած բոլոր հարցերին չեմ կարող պատասխանել, որովհետև տեղյակ չեմ:
–Պարո՛ն Բաբայան, հայտարարությունից նաև անհասկանալի է, թե հիմա «Բարգավաճ Հայաստանը» որտե՞ղ է իրեն տեսնում:
-«Բարգավաճ Հայաստանը» միշտ եղել է ժողովրդի կողքին, մենք միշտ կանգնած ենք եղել մեր քաղաքացիների կողքին, փորձել ենք լուծել մեր քաղաքացիների խնդիրները, և՛ ԲՀԿ խմբակցությունը, և՛ խորհուրդը, և՛ պարոն Ծառուկյանը, տարիներ շարունակ եղել են ժողովրդի կողքին՝ և՛ երիտասարդության, և՛ գիտության, և՛ սպորտի, բոլոր ոլորտների: Եկեք չմոռանանք, որ կյանքը շարունակվում է, նախագահական ընտրություններով չի որոշվում ժողովրդի ճանապարհը, և դրանով չի ավարտվում հսկա անելիքները: Մենք, ասելով, որ ժողովրդի կողքին ենք, ուղղակի բառեր չենք ասում՝ մարդիկ իրենց մաշկի վրա զգացել են մեր ամենօրյա գործունեությունը: Շարքային քաղաքացու խնդիրը մեր խնդիրն է:
–Ազատության հրապարակում էլ է ժողովուրդ կանգնած, ուրի՞շ ժողովուրդ է:
-Դուք ասում եք, որ եթե վերցնենք իքս քանակությամբ ժողովուրդ, դա ամբողջ ժողովուրդն է:
-Այսինքն՝ այն մարդիկ, որոնք Ազատության հրապարակում են, այն ժողովուրդը չէ՞, ում կողքին պետք է լինեք:
-Իհարկե ժողովրդի մի մասն է, մեր հասարակության մի մասն է: Մենք հայտնել ենք մեր մտահոգությունը նրանց վերաբերյալ, իսկ Դուք ասում եք՝ ժողովուրդն այնտեղ է, դուք այնտեղ չեք, դա ուղղակի սխալ հարց է: Մենք մեր հայտարարության մեջ նշել ենք, որ խաղաղ ցուցարարների նկատմամբ ուժ չկիրառվի, մարդիկ իրավունք ունեն բարձրաձայնել իրենց խնդիրների մասին և, իհարկե, մենք արդարացնում ենք խաղաղ ճանապարհով հարցերի բարձրաձայնումը, բողոքը մեր քաղաքացիների սահամանդրական իրավունքն է:
Լուսանկարը՝ Bravo.am-ի
