««Բարգավաճ Հայաստանը» համագործակցում է ընդդիմության հետ, փորձում է միավորվել, փորձվում է կուսակցությունից առանձնացված բեկորները նորից միասնական դարձնել: Նույն կերպ են վարվում նաև մյուս ընդդիմադիր քաղաքական ուժերը»,- «Առաջին լրատվական»-ի հետ զրույցում նման տեսակետ հայտնեց ՀԱԿ պատգամավոր, ՎՍԴՀԿ ատենապետ Լյուդմիլա Սարգսյանը՝ չհամաձայնելով մեր այն դիտարկմանը, թե նախկինում սահմանադրական բարեփոխումների խիստ ընդդիմախոս ԲՀԿ-ն իր դիրքորոշումը մեղմացրել և այդ հարցի շուրջ որոշակի գործակցության եզրեր է գտել իշխանությունների հետ:
Լ. Սարգսյանը նաև կարծում է, որ 2017 թվականի խորհրդարանական ընտրություններին ընդառաջ ընդդիմությանը ծանրագույն հարված հասցվեց, և ընդդիմադիր դաշտը հիմա ամայացած է: «Դա շատ ցավալի է, հատկապես որ ժողովուրդը հիմա կանգնած է լրջագույն խնդրի առջև՝ դա նաև էլեկտրաէներգիայի թանկացումն է, որն իր մեջ սոցիալ-տնտեսական լուրջ վտանգներ է պարունակում: Եվ այսօր չկա այն առաջնորդը, որը կկարողանար լուրջ մասսաներ հանել փողոց ու կանխել էլեկտրաէներգիայի թանկացման գործընացը»,- ասաց պատգամավորը:
Նրա խոսքերով՝ քաղաքում և մարզերում անցկացված երթերը մեծ ազդեցություն չեն կարող ունենալ այն որոշման վրա, որն իշխանությունը կկայացնի, եթե որոշի, որ այդ թանկացումն անխուսափելի է:
Լյուդմիլա Սարգսյանը հավելեց նաև, որ ընդդիմության հաջողության միակ երաշխիքը միավորվելն է. «Առանց նախապայմանների, առանց նախկին տարաձայնությունների միավորվելը: Իշխանությունն այսօր, ըստ էության, հակակշիռ չունի: Կան առանձին միավորներ, որոնք որոշ չափով փորձում են արձագանքել բոլոր այն երևույթներին, որոնք մեզ մատուցում է իշխանությունը, բայց դա լուրջ ազդեցություն թողնել չի կարող»:
Հարցին, թե հնարավոր համարո՞ւմ է նախկին քառյակի վերականգնումը, Լյուդմիլա Սարգսյանն ասաց. «Հնարավոր համարում եմ, եթե ձևավորվի կոնկրետ օրակարգ, համաձայնեցվի և կոնկրետ աշխատանք տարվի: Այդ միավորման գործընթացն ավելի տեսանելի կլինի աշնանը»:
